Ataatsimoorluta aallarteqqilerpugut

 

Nunaqarfiit pillugit isumasioqatigiinneq naammassivoq, inerniliinerillu piareerput: Inoqarfiit ingerlalluarsinnaanerulersinniarlugit oqallinneq suleqatigiinnerlu nukittorsarneqassaaq, ersarinnerusunillu iliuuseqarnernik kinguneqassalluni.

Isumasioqatigiinnerup naanerani Aningaasaqarnermut Naalakkersuisoq Vittus Qujaukitsoq ilaatigut oqarpoq: ”Ullut marluk ingerlanerini illoqarfinni minnerni nunaqarfinnilu innuttaasut ajornartorsiutit periarfissallu nutaat suut misigisarneraat paasinarnerulersinneqarput. Isumasioqatigiinnermi naleqarluartunik ilisimasaqalerpugut, aammalu Naalakkersuisuni Inatsisartunilu sulinissatsinni siunnerfissatsinni isumaqatigiissuteqarluta.

Ilaatigut nunaqarfinnik oqaloqateqarnerput nukittorsassavarput, nunaqarfinni siulersuisut suiassaannut pitsaanerusunik ersarinnerusunillu sinaakkusersuissaagut, pisariaqartinneqartunut aningaasaliissaagut, aammalu isumaginninnermi peqqinnissaqarfimilu atugassarititaasut sullissinerillu pitsanngorsassavagut, minnerunngitsumillu meerartavut inuiaqatigiillu eqqarsaatigalugit meeqqat atuarfii pitsaanerulersissallugit. Ukiuni tulliuttuni ineriartorneq atasinnaasoq inuiaqatigiillu atugarissaarfiusut pilersinneqarnissaat qanoq iliorluta qulakkeersinnaanerivut pillugu oqallinnitsinni nunaqarfiit avaqqutiinnarneqarsinnaanngillat, aammalu taamaaliussanngilagut”, Vittus Qujaukitsoq naggasiivoq.

Nunaqarfiit siulersuisuisa kattuffianni Kanunupe-mi siulittaasoq, Jens Kristian Therkelsen aamma isumasioqatigiinnerup ingerlaneranik naammagisimaarinnippoq, oqarlunilu: ”Suliarput aatsaat aallartilaaginnarparput. Nunatsinni pitsaanerusumik oqimaaqatigiissitsinissamut oqaatsit iliuuseqarfigineqarnissaannut nunaqarfimmiut ikiuukkusupput. Tamanna aqagu periarfissaqarfiusuni aallartereersinnaavarput.

Nunaqarfiit ajornartorsiutitut isigineqarsinnaanngitsut isumasioqatigiinnermi ersarissumik takutinneqarpoq. Pisuussutitut pingaarutilittut pigineqarput, aammalu maannamit annertunerusumik pigineqassallutik. Kanunupe nunaqarfimmiullu suliap ingerlaqqinnerani pilersitsiviulluartumik suleqataanissamut piareersimapput, aammalu kommunit taamatullu naalakkersuisut suleqatigilluarnissaannut qilanaarlutik”.

Jens-Erik Kirkegaard Inuussutissarsiornermut, Aatsitassarsiornermut Suliffeqarnermullu Naalakkersuisutut nunaqarfinni isorliunerusunilu ineriartortitsinissamut pilersaarusiassami ataqatigiissaarinissamut akisussaasuuvoq. Taanna oqarpoq: ”Nunaqarfiit ineriartortinnissaannut isumassarsiat pitsaasut pissarsiaqarfiginissaat isumagissavarput tapersersussallugulu. Taamaalilluta ilaatigut aningaasanut inatsimmi aningaasaliissutit aqqutigalugit ineriartortitsineq pitsaanerusoq pilersissinnaavarput. Suliap ingerlaqqinnerani suleqatigiilluarnissarput qilanaaraara, taamatullu 2014-imi maajimi nunaqarfiit ataatsimeersuarnissaat qilanaaralugu”.

Kiisalu Ineqarnermut, Avatangiisinut Pinngortitamullu Naalakkersuisoq Miiti Lynge oqarpoq: ”Sulinissami ilivitsuusumik eqqarsarfiusumik pitsaanerusumillu ataqatigiissaakkamik pilersaarusiornissamik kissaateqarneq aallaavigineqassaaq, tassanilu atasinnaasunik ineriartortitsinissamik kissaateqarneq tunngavigineqassaaq kulturikkullu kingornussavut ataqqineqassallutik. Oqartussaaqatigiinneq nukittorsarniarlugu inuutaasut akuutinneqarnissaat suleriaatsillu nutaat pisariaqarput. Suliaq iluatsissagutsigu ataatsimut akisussaaffeqarpugut”, Miiti Lynge naggasiivoq.

Ullut marluk inoqarfiit minnerusut siunissaat ineriartortinneqarnissaallu pillugit saqqummiussiviusut, oqaloqatigiiffiusut sammisaqartitsiviusullu qaangiupput. Peqataasut 90-it missaanniittut, nunaqarfinni siulersuisut siulittaasuinik, kommunini nunalu tamakkerlugu politikerinik, pilersuivinnit Namminersorlutik Oqartussanit pigineqartunit aallartitanik, ilisimatuunik aammalu Nunavummit tikeraanik ilaqartut oqallikkususseqarluarput.

 

Attaveqarfissat:

Vittus Qujaukitsoq (586116)

Jens Kristian Therkelsen (285416)