Umimmaat eqqissisimatitat

Moskusokse

Maniitsup Sermiata aamma Nuup nunataani umimmaat eqqissisimatitaapput. Naalakkersuisoqarfiup kissaatigaa uumasunik takunnissimanernit aamma unioqqutitsisumik piniartoqarsimanera pillugit paasissutissinneqarnissani.

Ukiut arlallit qaangiupput Kangerlussuarmi umimmaat Maniitsup Sermia itivillugu kujammut siaruaassimallutik. Umimmannik uppernarsarneqarsimasunik arlalinnillu uppernarsarneqarsimanngitsunik takunnittoqartarsimavoq Kangianut/Nuup Akianut kujasitsigisumi aammalu Nuup eqqaani Kangersunerup kujataatungaani. Aammattaaq uppernarsarneqanngitsunik niaqukunik timillu pisatakuinik nassaartoqarsimaneranik nalunaarutiginnittoqartarpoq, tamannalu unioqqutitsisumik piniartoqartarsimaneranik nalunaarutiginnittuusinnaapput.

Aalisarnermut, Piniarnermut Nunalerinermullu Naalakkersuisoqarfiup (APNN) erseqqissaatigissavaa umimmaat Maniitsup Sermiata kujataaniittut ukioq kaajallallugu eqqissisimatitaalluinnarmata. Taakkununngali ilaanngillat Ivittuut eqqaanni umimmaat, piniarneqarnerinut pisassiissutitaqartut.

APNN-ip kissaatigaa ukiuni kingullerni Maniitsup Sermiata kujataani sumi umimmannik takunnittoqartarsimanersoq tamakkerlugu uppernarserusullugu. Taamaattumik inuussutissarsiutigalugu piniartut, sunngiffimmi pinialuttartut allalu pinngortitami angalaartartut kaammattorneqarput umimmannik takunnissimanerminnik APNN-imut paassisutissanik nassiusseqqullugit imaluunniit siarngutigeqqullugit. Tassunga atatillugu paassisutissat uku kissaatigineqarput:

• Takunnissimanermut ulloq/ukiorlu.
• Umimmaat qassit.
• Qanoq utoqqaatigiunnarneri (inersimasuunersut/suiaassusaat, umimmaat inuusuttuunersut, piaraanersulluunniit)
• Sumiiffik (nunap assingani imaluunniit GPS atorlugu sumiiffik).

Ilanngullugu Naalakkersuisoqarfimmit kissaatigineqarput umimmannik toqunikunik niaqqukunillu takunnissimanerit pillugit paasissutissat.

Paasissutissat uunga nassiunneqarsinnaapput: APNN, Postboks 269, 3900 Nuuk imaluunniit mailikkut apnn@nanoq.gl atorlugu imaluuunniit oqarasuaatikkut: 34 50 34/34 5345.

Umimmaat Maniitsup Sermiata kujataaniittut ukiuni aggersuni qanoq aqutsivigineqassa-nersut pillugu suli aalajangiisoqarnikuunngilaq, taamaallaat umimmaat manna tikillugu eqqissisimatitaalluinnarput.
Naalakkersuisoqarfik kommuninut kattuffinnullu attuumassuteqartunut aalajangiinnginnermi tusarniaaniarpoq umimmaat pineqartut 2014-ip aasaaneraniit qanoq aqutsivigineqassanersut.



Sukumiinerusumik paasissutissat pissarsiarineqarsinnaapput Allaffimmi Pisortaq Amalie Jessen aqqutigalugu, amalie@nanoq.gl, oqar.: 34 53 04