Naalakkersuisut Kommunillu

Naalakkersuisut kommunit akornanni oqimaaqatigiissitsineq pitsaaneq pilersippaat

Naalakkersuisut aalajangerpaat, Inatsisartut Ukiakkut Ataatsimiinneranni 2014-imut Aningaasanut Inatsisissatut siunnersuutissamut allannguutissatut siunnersuummik, kommuninut 2014-imi ataatsimoortumik tapiissutinik kommunit akornanni agguaassisarnerup allanngortinneqarneranik kinguneqartussamik, saqqummiussiniarlutik.

Tamatuma nassatarissavaa, Kommune Kujallermut aamma Qaasuitsup Kommuneanut ataatsimoortumik tapiissutit 8 aamma 12 mio. kruuninik qaffanneqarnerat, Kommuneqarfik Sermersuumullu ataatsimoortumik tapiissutit 20 mio. kruuninik ilanngarneqarnerat. Tamatuma nassatarissanngilaa kommuninut ataatsimoortumik tapiissutit tamarmiusut annertunerusumik allanngortinneqarnerat.

Naalakkersuisut kommunit ullumikkut aningaasaqarnermikkut naligiinnginnerat tunngavigalugu taamatut aalajangerput, kommunillu aningaasaqarnikkut inissisimanerlunnerit nukittorsarniarlugit taamatut naligiinnginnerup pisariaqalersippaa aalajangersimasumik iliuuseqarnissaq.

Naalakkersuisut 2014-imi kommuninut ataatsimoortumik tapiissutit agguataarnerisa allanngornerat ikaarsaariarnermi aaqqiinertut isigaat. Naalakkersuisut piffissami aggersumi kommunini akileraartarnermik nalimmassaaneq aamma atatsimoortumik akileraarutit agguaattarnerat 2015-imi atuutilersussaq pillugu kommuninik oqaloqateqarneq aallartissavaat.

Naalakkersuisut kommunit 2014-imut ataatsimoortumik tapiissutissaannut atatillugu isumaqatigiinniarnermi KANUKOKA kommuninut tapiissutit agguaannerisa allanngornerat pillugu isumaqatiginiarsimagaluarpaat. Tamanna pillugu KANUKOKA-p siulersuisui isumaqatigiissuteqarfigineqarsimasinnaasimanngillat, Kommuneqarfik Sermersuup ataatsimoortumik tapiissutit agguaanneqartarnerat pillugu allannguutit akueriumasimanngimmagit.

Isumaqatigiinniarnerup kingorna kommunit pingasut borgmesterii Naalakkersuisunut kommuninut aningaasanik agguaassisarneq allanngortinneqartoq pillugu saaffiginnissuteqarsimapput.

Naalakkersuisut saaffiginnissut aallaavigalugu iliuuseqarnissartik aalajangersimavaat. Naalakkersuisut kommunit Naalakkersuisut aalajangernerat pillugu allaffigisimavaat, taamaasillutik kommunit 2014-imut kommunini missingersuutit suliarinerannut atatillugu tamanna pingaartinniassammassuk.

Inussiarnersumik inuulluaqqusillunga


Vittus Qujaukitsoq