Nunarsuarmi silap pissusiani killiffik

Nunarsuarmi silap pissusianik ilisimatusarnikkut naliliinerup annertunerpaap eqikkarnera ullumikkut nunarsuaq tamakkerlugu naalakkersuisunut ilisaritinneqarpoq. FN-imi silap pissusia pillugu oqallittartoqatigiit (IPCC) ilisimatusarnikkut nalunaarusiartik pingaarneq, ilisimatuut immikkullu ilisimasallit siuttuusut ukiorpaalunni suliarisimasaat tunngavigalugu politikerinut arlalinnut inassuteqaatinik saqqummiussisuupput.
Silap pissusia pillugu oqallittartoqatigiit nalunaarusiaat pingaarneq silap pissusianut aammalu inuit silap pissusiata allannguutaannut sunniuteqarnerinut killiffinnut tunngasuuvoq. Taanna silap pissusia pillugu ilisimatusarnerup iluani ilisimatusarnikkut uppernarsaatissat pingaarnersaattut isigineqarpoq.

Silap pissusia pillugu oqallittartoqatigiinnit oqaatigineqartut malillugit nunarsuarmi inuiaqatigiit eqqortumik ingerlanngillat. Ikummatissanik nunap iluaneersunik ikuallaasarneq ingerlaannassappat, aammalu orpippassuarnik piiaaneq annertuumik killilersorneqalinngippat, nunarsuarmi inuit pilersitaannik kissakkiartornerup qaffaqqinnissaa misigissagipput nalunaarusiami eqqoriarneqarpoq.

Ineqarnermut, Pinngortitamut Avatangiisinullu Naalakkersuisoq Miiti Lynge, nunani avannarlerni ministereqatini aamma FN-ip silap pissusia pillugu oqallittartoqatigiivini siulittaasoq Dr. Rajendra peqatigalugit nalunaarusiap Stockholmimi ilisaritinneqarneranut peqataavoq. Naalakkersuisup nunani avannarlerni naalakkersuisunit inuussutissarsiornermillu ingerlataqartunit aallartitat peqatigalugit, piffissaq iluatsillugu inuussutissarsiutinik ingerlataqartut silap pissusianut ajoqutaannginnerusumik iliuuseqarniarnermi annertunerusumik suleqataatinneqarsinnaanerat pillugu oqallinniarput.

Ilisarititsinermut atatillugu silap pissusianut allannguutit inunnit pilersinneqartut akiorniarnerini nunat tamarmik peqataanissasa pingaaruteqarnera Miiti Lyngep tikkuarpaa:

- Silap pissusia pillugu oqallittartoqatigiit nalunaarusiaat eqqarsaatigalugu, silap pissusia pillugu isumaqatigiissutip ataani 2015-imi silap pissusianut isumaqatigiissusiornermi nunarsuarmut tamarmiusumut atuuttussamik, inatsisitigut pituttuiffiusumik naapertuuttumillu ataatsimut malunniuteqarnissarput uatsinnut pingaaruteqartorujussuuvoq. Tamatumunngalu atatillugu ilisimatusarnerit inerneri, silap pissusia pillugu oqallittartoqatigiinnit uatsinnut ilisaritinneqartut, isumaqatigiissummik angusaqarnissamut pisariaqartinneqartut angusaqarnissatsinnut qanoq iliortoqartariaqarneranik nunarsuarmioqatigiinnut paasititsiniaanermut atorneqarnissaat pingaaruteqarpoq.

- Kalaallit Nunaanni nunap ilusiani silallu pissusiani pissutsit immikkut ittut, nunanit avannarlernit allanit allaanerusut atugaraavut. Taamaakkarluartoq aniatitavut killilersorniarlugit, tassungalu nukissiuutit ataavartut atorneqarnerat ilanngullugu, qanoq iliorsinnaanerluta ilisimavarput.

Silap pissusia pillugu oqallittartoqatigiit nalunaarusiaat kingulleq 2007-imeersuuvoq, nalunaarusiarlu tulleq, silap pissusia pillugu oqallittartoqatigiit silap pissusiata allannguutai pillugit nalunaarusiaasa pingaarnerit tallimassaat, 2013-ip aamma 2014-ip ingerlanerani pingasunngorluni saqqummersinneqassaaq.

Apeqqutissaqarnermi attaveqarfissaq: Naalakkersuisoq Miiti Lynge, tlf: (+299) 345000. e-mail: ipan@nanoq.gl