INUILI-mi siulersuisut

Nick N 040613 KNAPK-p INUILI-mi siulersuisuni ilaasortaatitaqannginnissaanik aalajangernera aalajangiusimavara.

Qitiusumik ilinniarfinni siulersuisunut ilaasortat inuussutissarsiutinut ilinniarnernik ilisimasaqassapput, qitiusumik ilinniarfiit suliamik ingerlatsiviinut suliaqarfinnullu qitiusumik ilinniarfiit ataasiakkaat ilinniartitsivigisaannut attuumassuteqassallutik. Tassunga atatillugu atuarfimmut tunngatillugu pilersuisut KNAPK-p sinniisuuffigineruai, suliffeqarfiillu INUILI-mi ilinniarnermik naammassisunik sulisoqalertartut sinniisuuffiginagit.

Tamassuma kinguneraa INUILI-mi siulersuisut immikkoortuni atuarfiup ilinniartitsiginerusaani kattuffinnit toqqarneqartartut, uanilu tassaapput:
- akunnittarfiit neriniartarfiillu kisaalu
- pisiniarfiit inuussutissanik nioqquteqartartut aamma
- suliffeqarfiit inuussutissanik tunisassiortartut.

Ilinniarnissanik atuarfik ullumikkut ukuninnga neqerooruteqartarpoq:
- Igasut
- Saqisut
- Inuussutissalerinermi assistentit
- Inuussutissalerinermi ikiortit
- Saaffiginnittarfinni takornariartitsinermilu assistentit
- Cateringimi kantinanilu assistentit
- Neqilerisut
- Iffiortut
- Saaffiginnittarfinni sulisut
- Tunisassiornermi teknikerinik ilinniartitsineq

Sulisitsisut amerlasuunik sinniisoqarnissaasa ingerlateqqinneqarnissaanik aalajangerninnut tamanna tunngaviuvoq, taamaalilluni siamasissumik sinniisoqarnissaq qulakkeerneqarsinnaaniassammat. Kattuffiit tamassuma saniatigut siulersuisunut ilaasortassanik toqqaasussaatitaapput, taamaalilluni atuarfiup ingerlatsineranut akisussaasunut tunngatillugu pisariaqartunik piginnaasaqartunik ilaasortaqassalluni.

Isumaqatigaara INUILI-p, soorunami, nunatsinni inuussutissalerinermik ilinniarfittut ingerlatsinermini pisuussutitta pitsaasut atornissaat isiginiassagai, tassungalu atatillugu INUILI-p pilersuisut aggersarsinnaavai, assersuutigalugu sammisat pilersuisunut tunngassuteqartut siulersuisut ataatsimiinneranni workshopiniluunniit suliarineqarneranni KNAPK aggersarsinnaavai.

KNAPK ullumikkut Imarsiornermik Ilinniarfimmi siulersuisuni ilaasortaatitaqarpoq, aammalu imarsiornermik ilinniarfiit aaqqissuunneranni ingerlatiinnarnerannilu pissusissamisoortumik peqataasarlutik – pingaartumik massakkut, Piniarnermut Aalisarnermullu Ilinniarfik aamma Ilinniarfiup ingerlataanut ilaalernikuummat.


Inussiarnersumik inuulluaqqusilluta



Nick Nielsen