Nick Nielsenip alimmasissumik atuartitsisarneq pitsanngorsarusuppaa

 

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen nunatsinni nunaqarfiit avannarliit ilaannut angalareerluni angerlamut apuuppoq: Upernaviup avannaani Nuussuarmut, Innaarsummut Aappilattumullu.

Angalanermi siunertaavoq avinngarusimasuni nunaqarfinni meeqqat atuarfianni atugassaritinneqartut paasisaqarfiginissaat. Avinngarusimasunut ilinniartitsisunik ilinniarsimasunik sulisussarsiortarneq ajornakusoorpoq, taamaammallu pingaaruteqarpoq alimmasissumik atuartitsisarnerup ineriartortinneqarnissaa atorneqarnissaalu. Atuartitsinernut pissutsinut isummani pillugit Nick Nielsen imatut oqaaseqarpoq:

 ”Ajoraluartumik paasinarsivoq alimmasissumik atuartitsisarneq pitsaarpianngitsumik ingerlasoq. Pitsaasoq tassaavoq timelærerit pikkorissarnikuunerat teknikkikkullu atortut atornissaannut piareersartinneqarlutik. Klassini atuartitsinermi anguniakkat atuartitsinermilu pilersaarutit qanoq atornissaat ilinniarnikuuaat, atuartitsinertillu pitsaanerusunngortissinnaajumallugu alimmasissumik atuartitsineq paasissutissanik, suliassanik apeqqutinillu paarlaasseqatigiittarnermut atorusullugu. Atuartitsisut akornanni annertuumik tunniusimaneq malugaara. Ajoraluartumilli aamma nassuerutigisariaqarpara teknikkut atortut piffinni tamani ikkussorneqarnikuunngitsut, allanilu internetimut atassuteqaateqartoqanngitsoq imaluunniit tamanna amigarluni”.

Naalakkersuisoq Nick Nielsen nunarfinnut tikeraarnini tunngavigalugu suliniummik suliaqarneq siuarsarniarsariniarpaa.

”Teknikkikkut ajornartorsiutit aaqqinneqarnissaat pillugu kommuni Inerisaavillu oqaloqatiginiarpakka, taamaalilluni suliniut aallartilluarniassammat. Meeqqat atuarfiata pitsanngortinnissaa tamatta ataatsimut akisussaaffigaarput, isumaga malillugu alimmasissumik atuartitsisarneq annertunerusumik atorniartariaqarparput.”

Naalakkersuisoq Nick Nielsen naggasiilluni angalanini tunngavigalugu eqqarsaatini eqikkarpai.

”Suliniummit pingaarutilinnik misilittagaqarlersinnaavugut: Atuartut qitiutinneqassapput qulakkiissavarpullu avinngarusimasuni atuartut ataasiakkaat pitsaanerpaamik ilikkagaqartarnissat. Timerlærerit atuartuutitik ilisimasarigaat ilikkagaqarniassammatalu sulilu pikkorinnerulerniassammata qanoq iliortoqassanersoq nalunngikkaat eqqaamassavarput. Init atuartitsinerup pitsaanerpaamik alimmasissumik atuartitsinermi pigineqartussat misilerarpagut, tamannalu ininik alimmasissumik atuartitsinermi suliniutinik siunissami sanaartornermik pilersaarusiornissami atorsinnaavarput.

Immakkut kabelinit illoqarfinniillu anginerusunit taamatut ungasitsigisumut angalalluni pissutsillu qanoq ingerlanersut takusarneri pitsaasuuvoq. Ulluinnarni suut unammilligassaanersut sumiiffinnilu innuttaasut taakku qanoq aaqqinneqarnissaannik qanoq isumaqarnissut takullugu pitsaasuuvoq. Ilinniagaqarfinni assigiinngitsuni ukiamut arlalinnik workshopeqarnissaa qilanaaraara, taakkunani soqutigisaqartut naapissavakka aammalu ilinniartitaanermut pilersaarut II Naalakkersuisut 2014-imi upernaakkut ataatsimiinneranni saqqummiussassaat pillugu inassuteqaat pillugu pitsaasumik oqaloqatigissallugit. ”

 

Inussiarnersumik inuulluaqqusillunga

 

Bent Møller

Toqq/direkte 345702

bmol@nanoq.gl