Dagfinn Høybråten-ip Nuuk tikeraarpaa

Aleqa og Dagfinn

Avannaamioqatigiinni Ministerit siunnersuisoqatigiiffiata generalsekretær-iata (siulittaasuata) Dagfinn Høybråten-ip Nuuk tikeraarpaa.

Avannaamioqatigiinni Ministerit siunnersuisoqatigiiffiata generalsekretær-ertaavata Dagfinn Høybråten-ip sapaatip akunnerani uani Nuuk tikeraarpaa, Naalakkersuisup Mette Lynge-p Katuami nunat avannaamiut isumasioqatigiisitsineranni peqataassalluni. Generalsekretær-ip tikeraarnera nunat avannaamiut suleqatigiinnerisa saqqummiunnerannut tunngassuteqarpoq. Generalsekretær-inngornermi kingorna nunat arfineq-pingasut tamaasa tikeraassavai.

Mette Lyngemik ataatsimeeqatiginninnermi generalsekretær-ip uppernarsarpaa,
Aluu Nunat Avannarliit paasissutissiisarfiata allilerneqarnissaa pillugu Kalaallit Nunaanniit saaffiginnissut akuersaassallugu piareersimaffigigaat, tamannalu aamma Kalaallit Nunaanni suleqataasussamut atuutissasoq.

Generalsekretær-ip Aleqa Hammond-imik ataatsimeeqateqarnerani Kalaallit Nunaata nunanik avannarlernik suleqateqarnerata pingaartinneqarnera oqaluuseraat, generalsekretær-illu erseqqissaatigaa nunat avannarliit ministerråd-ianni ataatsimiinnerni tamani peqataasinnaatitaanera Kalaallit Nunaata atorsinnaassagaa.

Aleqa Hammondip erseqqissaatigaa, Kalaallit Nunaata nunanik avannarlernik suleqateqarnera nunanut allanut attaveqartarneranut qitiusumik inissisimaffiusoq. Ilisimatitsissutigaa Avannaamioqatigiinni Ministerit siunnersuisoqatigiiffiata ataatsimiinnissaani tullermi peqataanissani isumannaarneqareersoq, taamaalilluni statsministerit ataatsimiinnerini katersuunnermilu naalakkersuinikkut oqaluuserinnittarnerit peqataaffigisassallugit.

”Nuannaarutigalugu erseqqissaatigissavara nunat avannarliit nunanut issittunut soqutiginninnerat. Nunat avannarliit suleqatigiinnerat nunanut allanut naalakkersuinikkut salliutitatta pingaarnersaraat. Kalaallit Nunaata ukiuni tulliuttuni nunani tamalaani peqataaleriartornera uanga pingaarteqaara - aamma nunat avannarliit siuttoralugit.” Aleqa Hammond taama oqarpoq.