Aningaasaateqarfik ataaseq – siunertat amerlasuut

Meeqqat aamma isumassugassamik sumiginnaaneq pillugu filmi, kinguaassiuutinik ilinniartitsineq pillugu isumasioqatigiinneq, Tasiilaq pillugu atuagaq aamma Sisimiuni ilinniarnertuunngorniarfimmiittut nunatsinni pinngortitami paasisassarsiornerat. Pilersaarutit taakkuupput DOG-Fondenimit 2013-mi tapiiffigissallugit toqqarneqarsimasut.

DGO-Fonden (Namminersorlutik Oqartussat aamma Kalaallit Nunaanni Uuliasioqatigiiffiup Aningaasateqarfiat) 1987-mi pilersinneqarpoq. Aningaasaateqarfiup siunertaraa nalinginnarmik iluaquutaasunut, kultureqarnikkut imaluunniit ilinniartitaanikkut ingerlataqartunut tapiissuteqarnissaq. DGO-Fondenimi siulersuisuni siulittaasoq, Peqqissutsimut Attaveqarnermullu Naalakkersuisoq Steen Lynge oqaluttuarpoq aningaasaateqarfik assigiinngitsorpassuarnik sammisaqartoq pilersaarutillu assigiinngitsut tapiiffigitissimasut:

- DGO-Fonden kulturimut tapertaavoq ullut allanngorneqalerfiini Tasiilaq pillugu oqaluttuanut tapiissuteqarnikkut. Oqaluttuat kikkunnut tamanut maannakkut Nunatsinnut siunissamilu kinguaariissanut soqutiginnittunut nuannaarutaapput. Aamma nalinginnarmik iluaqutaasut aningaasaateqarfimmit soqutigineqarput. Minnerunngitsumik pilersaarutit meeqqat atugaannik pitsaanerulersitsisut. Ukioq manna taamaattumik filmiliorneq, isumassugassamik sumiginnaaneq pillugu paasissutissiisoq tapiiffigaarput, oqaluttuarpoq Steen Lynge nangillunilu.

- DGO-Fonden pilersaarutit piviusunngortinnissaannut iluaqutaavoq, tapiiffigineqanngikkunik eqqarsaatitsialaaginnartussaagaluit. Upperaarput pilersaarutit tapiiffigineqartut tamarmik isumannaatsuusut aamma ukiuni aggersuni inuiaqatigiinnut kalaallinut ajunngitsumik iluaqutaassasut. Pilersaarutit assigiinngitsorpassuit tapiiffigineqarsinnaapput, taamaattumik arlaannik ingerlataqarusukkuit DGO-Fondenimut qinnuteqaammik nassiussigit.

Siulersuisut ukiumut ataasiarlutik aningaasanik agguaassiniarlutik naapiitarput. Siulersuisut tassaapput Steen Lynge, Peqqissutsimut Attaveqarnermullu Naalakkersuisoq, Nick Nielsen, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq kiisalu Ann Birkekær Kjeldsen, Peqqissutsimut Attaveqarnermullu Naalakkersuisoqarfimmi pisortaq.

DGO-Fondenimiit tapiiffigitinnissaq pillugu qinnuteqarniaruit Peqqissutsimut Attaveqarnermullu Naalakkersuisoqarfimmut, pan@nanoq.gl aqqutigalugu kingusinnerpaamik 1. maj 2014-mi allakkatigut qinnuteqaat nassiutissavat.