Naalakkersuisoqarfiup pisortartaava tunuarpoq

Aningaasaqarnermut Nunamullu Namminermut Naalakkersuisoqarfimmi qullersaq Carsten Frank Hansen nammineq piumassutsiminik ingerlaannartumik atuutilersumik atorfimminiit tunuarpoq.

Carsten Frank Hansen (44) atorfimmini sulilerpoq tallimanngorneq 13. september 2013, ullulli suliffiit marluk sulereerluni atorfini qimallugu.

Carsten Frank Hansen:
- Danske Andelskassers Bankimit suliunnaareernerma kingorna aningaasanik peqquserluuteqarsimatutut pasillerneqarpunga. Misissuineq maanna ingerlanneqarpoq, misissuinerullu inernera uannut pitsaasumik inerneqassasoq naatsorsuutigivara.

- Naliliinerlussimavunga, naliliinerlullunga pisoq taanna pillugu Namminersorlutik Oqartussat ilisimatissimanngilakka. Greentop Greenland A/S-imi suliunnaarnera Namminersorlutik Oqartussani atorfinitsitaaninnut attuumassuteqarpoq.

- Ajuusaarpunga paasissutissat tamakku saqqummiussimannginnakkit, siunertarisimanngilarali salluliuuteqarnissara. Naalakkersuisut isiginerlunneqarnissaat siunertarisimanngilara, iliuuserisimasamali kinguneri malitseqartippakka aalajangerlungalu atorfinniit tunuassallunga – misissuinerit ingerlasut uannit pisuutitsissanngikkaluarpataluunniit.

Pisortaaneq Svend Hardenberg, Naalakkersuisut Siulittaasuata Naalakkersuisoqarfia:
- Qamannga pisumik ajuusaarpunga paasissutissat Berlingske Businessip saqqummiussai Carsten Frank Hansenip atorfinitsinneqannginerani ilisimasimannginnatsigit. Naammagisimaarparput Carsten Frank Hansenip tunuarnissaminik nammineq aalajangernera.


Allamik aalajangiisoqartinnagu Aningaasaqarnermut Nunamullu Namminermut Naalakkersuisoqarfimmi pisortaagallartutut Peter Hansen sulissaaq.


Annerusumik attaveqarniaraanni:
Svend Hardenberg, Pisortaaneq, Naalakkersuisut Siulittaasuata Naalakkersuisoqarfia,
Tel. +299 34 5103