Ineqarneq pillugu politikki

Ineqarneq pillugu politikkip ilusilersorneqarneranut angusaqarfiusumik oqaloqatigiinneq

- Nuannaarutigaara Bank Nordik-ip, Grønlandsbanken-ip aamma Nykredit-ip akornanni ataatsimeeqatigeeqqammernitsinnut Namminersorlutik Oqartussat Illuut A/S-imit pigineqartut inissiat ilaasa attartortunut tuniniarneqarnissaannik pilersaarutaat pillugu – taama oqarpoq Aningaasaqarnermut Nunamullu Namminermut Naalakkersuisoq Vittus Qujaukitsoq.

Ataatsimeeqatigiinnissaq aaqqissuunneqarsimavoq aningaasalersuisarnermik ingerlatseqatigiiffiit ernummateqarnerat tunngavigalugu, tassalu Nuummi 2014-imi Illuut A/S-imit pigineqartut inissiat amerlasuut attartortunut tuniniarneqarnissaanik siunnersuutip kingunipilorisinnaasai pillugit. Ataatsimeeqatigiinnerup kinguneraa suligasuartitassamik suleqatigiissitaliortoqarmat taassuma periuseq isiginiassagaa, qanoq annertutigisumik aningaasalersuisarnermik ingerlatseqatigiiffiit kaammattuutaat naatsorsuutigisaallu, namminerisamik inissianik tuniniaaviup nammassinnaasaa, Nunatta Karsiata isertitaqarnissamik pisariaqartitsinera taperserneqarsinnaassanersut aamma Naalakkersuisut politikkiat tassalu attartortut periarfissinneqassasut namminerisaminnik inissiaatileqalernissaminnut.

Ataatsimeeqatigiinnermi tamanit isumaqatigiissutigineqarpoq, siunissami inissianik tuniniaaviup ilusilersorneqarnissaa pillugu pitsaasumik minnerunngitsumillu angusaqarfiulluartumik oqaloqatigiissutigineqassasoq tassani ilaatigut aallaavigineqassallutik Akileraartarnermut Atugarissaarnermullu Ataatsimiititaliap kaammattuutai soorluttaaq Siumut, Atassut aamma Partii Inuit akornanni naalakkersuisooqatigiinnissamik isumaqatigiissutaat - Aningaasaqarnermut Nunamullu Namminermut Naalakkersuisoq Vittus Qujaukitsoq oqarpoq.

Annertunerusumik paassissutissanik ujartuinermi saaffigineqarsinnaavoq: Michael Rudy Schrøder, AC-Fuldmægtigi, oqarasuaat toqqaannartoq 34 52 08.