KNR-imut naqqiut

Unnummut 17. september 2013-imi KNR Radiukkut oqaatigineqartumut naqqiut

All. Pisortaaneq Svend Hardenberg, Naalakkesuisut Siulittaasuata Naalakkersusioqarfia

Carsten Frank Hansenimut tunngatillugu innersuussutinik Greentop-imit pissarsisoqarsimasoq oqarsimanerarneqarlunga unnummut radioaviisikkut issuarneqarpunga. Tamanna ilumuunngilaq, paatsuuinerlu taanna pillugu tusagassiortoq apersuinermi ilisimatippara. Aamma ilanngussassap allannera tigoreerakku tamanna mail-ikkut ilisimatitsissutigeqqippara.

Greentop-imit innersuussutinik tigusisoqarsimasoq oqarnerarneqarnera kukkusuuvoq.

Kisiannili oqaatigaara siunnersorti innersuussutinik arlalinnik pissarsisimasoq, uangalu nammineerlunga allamut atatillugu Greentop-ip siulersuisuini siulittaasoq Ole Rud oqaloqatigisimallugu. Carsten Frank Hansenip Kalaallit Nunaannut aallannginnerani isumagisassanut tunngatillugu pissarsiariniarneranut atatillugu tamanna pivoq. Tupaallaatigisannik Ole Rud-ip oqarasuaat tiguaa, uangalu ukiorpassuarni oqaloqatigisimannginnakku, aammalu GA-mi pisortaanerata nalaani ilisarisimagakku oqaloqatigillatsiarpara.

Tamatumunnga atatillugu tamatumaluunniit kingorna sooq Carsten Frank Hansen Greentop-imi suliunnaarsimanersoq pillugu Ole Rudip ilisimatissallunga tunngavissaqartutut misigisimasimanngilaa. Carsten Frank Hansenip Greentop-imi atorfimminit soraarsitaasimasoq Berlingske Business-ip allaaserisamini oqaluttuarimmagu paasiniaaniarlunga ippassaq Ole Rud sianerfigiganni tamanna uannut oqaatigaa. Ilisimatippaanga arlaleriarluni pisimasut pillugit ilisimatissanerlunga eqqarsaatigisarsimallugu, taamaaliorniaranili aalajangersimalluni. Soorunami taamatut pisoqarnera ajuusaarutigaa.

Ole Rud-ip oqaloqatiginera siulleq Carsten Frank Hansen-ip Greentop-imi suliunnaarsimatsiarnerani, aammalu Nuummut aallannginnerani pivoq. Aappassaanik 16. september 2013-imi nal. 14:23 oqaloqatigaara, taannalu minutsinik 14-inik sivisussuseqarpoq.

Tamanna qanoq saqqummiunneqarnersoq, imaluunniit tamatuma kingorna Ole Rud pissusiviusut pillugit qanoq oqaluttuarnersoq saqqummiussisut namminneerlutik akisussaaffigissavaat.


Inussiarnersumik inuulluaqqusillunga

 

Svend Hardenberg, Pisortaaneq

Naalakkersuisut Siulittaasuata Naalakkersuisoqarfia