Ambassadørit nunatsinnut tikeraat

Kalaallit Nunaanni ambassadørit 21-it angalaqatigiittut Aleqa Hammondip naapippai

Sapaatip akunnerani matumani nunanit allanit ambassadørit 21-it Københavnimi allartitarineqartut nunatsinnut tikeraarput. Nunanut allanut Pisortaqarfik suleqatigalugu danskit nunanut allanut ministereqarfiannit aaqqissuunneqartumik ambassadørit 21-it taakkua Nuummut aamma Ilulissanut paasisassarsiorlutik angalapput. Ambassadørit Københavnimi aallartitarineqartut Kalaallit Nunaata paasisaqarfiginissaanut periarfissaqartinniarlugit, Kalaallit Nunaannut paasisassarsiorluni angalanerit ukiut sisamakkaarlugit aaqqissuunneqartarput.

Naalakkersuisut siulittaasuata Aleqa Hammond-ip ambassadørit ataasinngormat naapippai, Kalaallit Nunaanni ineriartornissamut periarfissat pillugit aammalu politikkikkut aalajangiinerit pingaaruteqartut Ukiaanerani ataatsimiinnermi Naalakkersuisut tungaanniit isummerfigineqartussatut siunnersuuteqarfigineqartut pillugit saqqummiussiffigalugit. Ambassadørit Kalaallit Nunaannut aammalu nunaminnik suleqateqarnerup annertusarneqarnerani pieriarfissaalertussanut soqutiginninnerujussuartik takutippaat.


Aallartitat Ilulissat eqqaanni sermimut takornariarnerminni.

Ambassadørit tikeraarsimaarnerminni Naalakkersuisunut ilaasortat arlallit kiisalu Kalaallit Nunaanni inuussutissarsiortut naapinnissaannut periarfissaqarsimapput.

Nunanut allanut ministereqarfimmut pisortatut toqqarneqaqqammersoq Ulrik Vestergaard Knudsen peqatigalugu ambassadørit Kalaallit Nunaannut tikeraarput, taannalu aamma tikeraarsimaarnerup nalaani ilaatigut urani aamma IWC pillugit immikkut Kalaallit Nunaanni atorfilittanik ataatsimeeqateqarpoq.

Tikeraarsimaarnerup nalaani ambassadørit Australienimeersoq, Indienimeersoq, Sydafrikameersoq aamma Schweitzimeersoq ataatsimeeqatigineqarput, tassani ilaatigut aatsitassarsiorluni misissuineq, nunap inoqqaavisa pisinnaatitaaffii, Issittumi Siunnersuisooqatigiit aamma niuernikkut suleqatigiinneq oqallisigineqarlutik.

Aallartitat - ambassadørit - ataasinngorneq septembarip 23-aniit tallimanngorneq septembarip 27-annut tikeraarnermi peqataasut ukunaneerput: Ghana, Sydafrika, Polen, Sverige, Spanien, Litauen, Indonesien, Nepal, Vietnam, Schweitz, Luxembourg, Thailand, Uganda, Australien, Mexico, Israel, Finland, Indien, Belgien, Østrig aamma Agentina. Tikeraarsimaarnerup nalaani peqataasut Nuummi aamma Ilulissani misigisaqarnissaminnik periarfissinneqarput.

Inussiarnersumik inulluaqqusillunga

Naalakkersuisut Siulittaasuata Naalakkersuisoqarfia sinnerlugu

Kai Holst Andersen
Nunanut Allanut Pisortaqarfimmi pisortaq