Nutaamik agguaaneq pisariaqarpoq eqqortuullunilu!

Ullumi tusagassiorfinni atuarneqarsinnaavoq, borgmester Asii Chemnitz Narup oqaaseqartoq, aningaasaqarnermut nunamullu namminermut Naalakkersuisup Vittus Qujaukitsup ilisimaarigaa, ataatsimoortunik tapiissutissat isumaqatigiinniutigineqarneranni ataatsimoortumik tapiissutit agguaanneqarnissaasa allanngortinneqarnissaat Kommuneqarfik Sermersuup piareersimaffigisimagaa.

Tamatumunnga ilisimatitsissutigineqassaaq, 2014-imut ataatsimoortumik tapiissutissat KANUKOKA-mik isumaqatigiinniutigineqarneranni ilisimatitsissutigineqarmat, KANUKO-KA ataatsimut tapiissutit nutaamik agguaanneqarnissaasa Namminersorlutik Oqartussanik oqaloqatigiissutigissallugit pisussaaffeqanngitsoq, Kommuneqarfik Sermersuummi KANUKOKA-mut erseqqissaatigimmagu, tunngaviusussat aallaavigalugit apeqqutip oqaluuserineqarnissaa kommunip kissaatigisimanngikkaa. Tamanna tunngavigalugu ataatsimoortumik tapiissutit agguaanneqarnissaat allannguuteqartinnagit 3. julimi isumaqatigiissutigineqarput.

Tamatumna kingorna nunap borgmesterii pingasut 12. augustimi allakkanik nassiussaminni peqqussuteqarput, Naalakkersuisut pimoorussillutik iliuuseqassasut, 20 mio. kr.-illu nutaamik agguaanneqarnissaat pillugu aalajangiillutik.

Vittus Qujaukitsoq imaattunik oqaaseqaateqarpoq:

”Naalakkersuisut nunami borgmesterit pingasut pingaarutilimmik peqqussutaat tusaanngitsuusaarsinnaanngilaat. Ukiuni arlalinni ataatsimut tapiissutit kommunit akornanni agguaanneqartarnissaat oqaluuserineqartarput, peqatigitillugulu kommunit akornanni assigiinngissutsit annertusiartuinnarsimallutik. Siornatigut Naalakkersuisut akuersaartutut pissusilersorsimapput, nutaamik agguaanissamut ataatsimoortumik kommunit namminneerlutik siunnersuummik saqqummiussaqarnissaat innersuussutigineqarmat.

Kommunit pingasut taakkua uannut allakkaminni erseqqissumik nalunaarutigaat, qanoq iliornikkulluunniit misiliigaluaraanni, kommunit imminerminni akunnerminni nutaamik agguaanissaq pillugu isumaqatigiissinnaassanngitsut. Taamaattumik borgmesterit peqqussutigaat, uanga suliassaq tamanna isumagissagiga inernermillu saqqummiussaqarlunga.

Akisussaaffik uanga tiguara, Nunatsinni ataqatigiissumik ineriartornissaq pillugu Naalakkersuisut anguniagaat upperalugu”.