Suliniutinut angisuunut inatsimmut allannguutissatut siunnersuutit nutaat

Suliniutinut angisuunut inatsimmut allannguutissatut siunnersuutit nutaat suliumajunnaarsinnaatitaanermut pisinnaatitaaffinnik isumannaaripput

Ullup unnuallu ingerlanerani suliniutinut angisuunut inatsisip Inatsisartuni tuaviuullugu aappassaanneerlugulu pingajuussaaneerneqartup qulaajaavigalugulu pitsanngorsarneqarnissaa Siumup ilaatigut qineqqusaarutigaa. Eqqaamaneqartutut Siumup inatsit akerlerinngilaa, pitsanngorsarnissaanulli inissaqarmat taaseqataanngilaq.

”Suliniutinut angisuunut inatsisip akuersissutigineranut atatillugu Kalaallit Nunaannit aamma nunanit allanit isornartorsiutaasup ilaa pinaveersimasinnaagaluarpoq Inuit Ataqatigiit Inatsisartunut kalaallit sulisartut kattuffiisa inissisimaffiinik isumannaarisinnaasunik malittarisassianik aalajangersakkanillu ilanngussuinissaannut piffissaliisimagaluarpata,” suliniutit angisuut pillugit Inatsisartut inatsisissaannut allannguutissatut siunnersuummut Inuit Ataqatigiit isornartorsiutaannut Inuussutissarsiornermut, Aatsitassaqarnermut Suliffeqarnermullu Naalakkersuisup Jens-Erik Kirkegaardip akissummini ilaatigut oqaatigaa.

Suliniutinut angisuunut atatillugu kalaallit sulisartut kattuffiisa inissisimaffiannik sunniuteqarsinnaanerannillu, minnerunngitsumillu nunanit allanit sulisartunut pissutsinik pitsanngorsaaniarnernut iluarsiissutinik malunnaatilinnik suliniutinut angisuunut inatsisip allanngortinnissaa pillugu Inatsisartut inatsisissaattut siunnersuut imaqarpoq, Inuussutissarsiornermut, Aatsitassaqarnermut Suliffeqarnermullu Naalakkersuisoq Jens-Erik Kirkegaard oqarpoq.

Sulisartup nuna allamiup kalaallit sulisartut kattuffianni ilaasortaasinnaanera, aamma Kalaallit Nunaanni nalinginnaasumik ataatsimoorussamik sulisartut eqqartuussiveqarnerannut naapertuuttumik kalaallit sulisartut kattuffiisa nunanit allanit sulisartuusumut isumaqatigiinninniarsinnaatitaanerat siunnersuummi erseqqissaavigineqarput.

Kalaallit sulisartut kattuffiisa suliumajunnaarsinnaatitaanerat, aamma sulisartumut nuna allameersumut ataatsimoorussamik isumaqatigiissuteqarnissamut anguniagaqarnermi tapersersuinerminut atatillugu ataatsimoorussamik akerleriissuteqarnermi alloriarnernik iliuuseqarsinnaanerat siunnersuutip erseqqissaavigissavai.

Siunnersuutikkut nuna allamiumut sulisartumut sulisartup nerisaqarlunilu najugaqarneranut, sullisaanut, akiliunneqarluni angalasarneranut, kiisalu sillimmasiinermut atatillugu aningaasartuutinik sulisitsisoq isumaginninnissamut matussusiinissamullu pisussaaffeqarnera siunnersuutikkut isumannaarneqassapput.

Sulisartuusunut pingaarutilittut nukittorsaat alla tassaavoq suliniummut angisuumut suliniummik ingerlatseqatigiiffik sulisartunut nunanit allaneersunut naammaginartumik akissarsiaqarnermi atorfinitsitaanermillu atugarisat suliffigisamilu pissutsit pillugit inatsimmi piumasaqaatinik nunanit allanit suliffeqarfiutilittami pilersuisumilu tamarmik naapertuutsitsinissaanik isumaginninnissaanut pisussaatitaanissaa.


Annertunerumik paasisaqarusukkuit attavigiuk Inuussutissarsiornermut, Aatsitassaqarnermut Suliffeqarnermullu Naalakkersuisoq Jens-Erik Kirkegaard.