Angusaqarnerulernissaat pillugu suleqatigiinneq

Vittus og færøsk minister

Pisortat suliffeqarfiutaasa angusaqarnerulernissaat pillugu suleqatigiinneq

Savalimmiormiut Aningaasaqarnermut Ministeriat Jørgen Niclasen ulluni makkunani pisortatigoortumik Nuummi tikeraarpoq.

Tassunga atatillugu Jørgen Niclassenip Aningaasaqarnermut Nunamullu Namminermut Naalakkersuisoq Vittus Qujaukitsoq ataatsimeeqatigaa.

Ataatsimiinnermi akileraartarnermut aningaasaqarnermillu aqutsinermi misilittakkat suleqatigiissutigisinnaanerat kiisalu Savalimmiut Kalaallit Nunaatalu akornanni marloriaammik akileraartarnerup nutarterneqarsinnaanera eqqartorneqarput.

Aningaasaqarnermut Ministeri Jørgen Niclasen ataatsimiissimaneq tunngavigalugu imatut oqaaseqarpoq: ”Savalimmiormiut tungitsinnit suliassaqarfiit pineqartut pillugit qaninnerusumik suleqatigiissinnaaneq annertooq takusinnaavarput. Taamaasiornikkut annertuumik atuisutut tamatsinnut iluaqutaasussamik suleqatigiinnikkut angusaqartoqarsinnaavoq.”

Aningaasaqarnermut Naalakkersuisup Vittus Qujaukitsuttaaq annertunerusumik ilisimasanik avitseqatigiinneq aamma allaffissornikkut periutsit aalajangersimasut ineriartortitseqatigiissutiginissaat pillugit periarfissat pitsaasut takusinnaanerarpai. Vittus Qujaukitsoq oqarpoq: ”Nunani Avannarlerni Killerni siornatigumut naleqqiullugu immitsinnut isumassarsiorfiginerulernissatsinnut piffissanngorsoraara. Unammilligassat taakkununngalu aaqqiissutissat eqqartorsimagaangatsigit, taava taakkua pillugit assigiinnik unammilligassarpassuaqartarpugut. Tamanna siunissami atorluarnerussavarput.”

Taamaattumik Jørgen Niclassenip Vittus Qujaukitsullu ukiup nutaap aallartinnerani ataatsimeeqatigeeqqinnissartik isumaqatigiissutigaat, taassumalu inernerissavaa iliuusissanik pitsaasunik aallartitaqarneq. Taamanikkussamut nunat pineqartut marluk allaffissornikkut suleqatigiinnissap qanoq isiorluni ingerlanneqarnissaa pillugu misissuissapput.