Ittoqqortoormiuni

Miiti Ittoqqortoormiini

Naalakkersuisoq Miiti Lynge Ittoqqortoormiinut tikeraarpoq

Naalakkersuisoq Miiti Lynge ministereqatiminut danskiusumut Martin Lidegaardipmut Ittoqqortoormiinut tikeraartitsisuuvoq.

Silap pissusiisa allannguutai Kalaallit Nunaanni uppernarsarluagaapput, ullumikkullu inuit inuunerminni tunngavigisaannut ulluinnarni inuunerannut annertuumik sunniuteqareerlutik. Miiti Lyngep tikeraartitsinermini Kalaallit Nunaanni, silap pissusiisa allannguutaanik qaninnerpaatut misigisaqarfiusumi pissusiviusut ministereqatiminut danskiusumut takutikkusuppai.

Ministerit ulluni kingullerni Zackenbergimi aamma Daneborgimi ilisimatusarfinni tikeraarsimasimapput, tassaniinnerminnilu ilisimatusartut sulinerat aammalu silap pissusiisa allannguutaannut taakkulu sunniutaannut isumaat paasisaqarfigaat. Ministerit Ittoqqortoormiiniinnerminni innuttaasut, najukkami politikerit inuussutissarsiornermillu ingerlataqartut silap pissusiisa allannguutai qanoq misigineraat pillugu oqaloqatiginissaannut periarfissarsivoq.
Ilaatigut najukkami piniartut ilaat imatut oqarpoq: “Nalinginnaasumik nannunniarnermi aqqutit maannakkut ingerlavissaajunnaarput. Apuk aakkami”.

Arnat illuanni nereqatigiinnermi, umimmammik siatamik sassaallerfiusumi, tamatumalu kingorna ataatsimiinnermi Naalakkersuisup Miiti Lyngep aamma Ministerip Martin Lidegaardip illoqarfimmi inuit pingaarutillit naapippaat, silap allannguutaasa illoqarfimmi inuit ulluinnarni inuunerinut sunniutai, aammalu taakku qaangerniarlugit suliniutit suut aallartinneqarsimaneri pillugit oqaloqatigalugit. Ataatsimiinnermut ilaatigut kommunalbestyrelsini ilaasortat Charlotte Pike aamma Erling Madsen, inuussutissarsiornermut siunnersuisoqatigiinnut ilaasortaq Tore Andreasen aamma piniartuusimasoq Jonas Napatoq peqataapput.

Ittoqqortoormiini ataatsimiinnermi ministerit marluusut taakku angalaqataasalu saniatigut aamma Kommuneqarfik Sermersuumi borgmesteri Asii Chemnitz Narup aammalu Aningaasaqarnermut Ataatsimiititaliami ilaasortat peqataapput.

Miiti Lynge oqarpoq: ”Ittoqqortoormiini innuttaasut naapissinnaagakkit, aammalu silap pissusiata allannguutai pillugit misigisaat tusarnaarsinnaagakkit nuannaarutigaara. Ullumi ataatsimiinnitsinni allannguutit pingaartumik piniarnermik inuussutissarsiornermut qanoq allanngortitsisimanerat tusarnaarpara, aammalu inuiaqatigiittut allannguutit taakku ilaannut qanoq iliorluta naleqqussarsinnaanerluta isumassarsiat tusarnaarlugit. Piniartut pinngortitamik uumasunillu ilisarisimannilluarput, oqaloqatiginerilu isumassarsilluarnartorujussuuvoq. Oqaluttuaat misilittagaallu angerlaatissavakka, taakkulu siunissami silap pissusiinut naleqqussarniarluta sulinitsinnut atorsinnaavavut.” Ukiut 120-t tikillugit matuma siornatigut tunumiut nunarsuup sinneranit avinngarusimallutik inuusimapput, tamannalu ersarilluinnartunik takussutissaqarpoq. Oqaasii allaanerupput, kulturimi oqaluttuat oqalualaallu tunngavigineqartorujussuupput, ilaatigullu tunumiut sanalugaat pilerigineqarluartut tamatumunnga ersiutaapput.

Innuttaasut aamma pinngortitaq suli annertuumik inuuffigaat inooqatigalugulu – imaq, sikut, qaqqat piniagassallu amerlanerpaanut pingaaruteqarluinnartuupput. Ilulissat kangerluillu qinngortuut pinngortitami misigisassanut imaannaanngitsunut sinaakkusiipput, amerlasuunut pilerinarlutik – aammattaaq nalinginnaanngilluinnartunik misigisaqarusuttunut. Nuna allanngutsaaliugaq avannarpasinnersaavoq – nunarsuarmilu annersaalluni.

Attaveqarfissaq: Apeqqutissaqarnermi attaveqarfissaq: Naalakkersuisoq Miiti Lynge, tlf: (+299) 345000. email: ipan@nanoq.gl