Qaqortup eqqaani mittarfik nutaaq pillugu sulinermut Naalakkersuisut tapersersuipput

Naalakkersuisut 2014-mut aningaasanut inatsisissatut siunnersuutertik saqqummiussimalerpaat. Tassunga atatillugu Peqqissutsimut Attaveqarnermullu Naalakkersuisup Steen Lyngep nuannaarutigaa Qaqortup eqqaani mittarfik nutaaq pillugu misissueqqissaarnissamut aningaasanik immikkoortitsinissamut periarfissiisoqarmat.

- Misissueqqissaarnernut aamma 2015 tikillugu sanaartornermi pilersaarummi misissueqqaarnernut 25 mio. kr.-it immikkoortinneqarput, nuannaarutigaaralu taakku ilai Qaqortumi mittarfimmut atugassatut immikkoortinneqarmata, taamatut oqarpoq Steen Lynge nangillunilu:

- Attaveqarnerni ineriartortitsineq tassaavoq siunissamut ungasinnerusumut aningaasaliineq, Inatsisartut tassani ilanngutitinneqartariaqarlutik. Naalakkersuisut isumaqarput aalajangiinerit tamarmik paasisisanik tunngaveqarluni aalajangiiffigineqartarnissaat pingaartuusoq, taamaalilluta innuttaasut aningaasaataannik illersorneqarsinnaasumik ingerlatsilluta. Taamaattumik Qaqortup eqqaani mittarfik nutaaq pillugu inaarutaasumik aalajangiitinnata misissueqqissaarnerit utaqqineqartariaqarput.

Qaqortup eqqaani mittarfiliornissaq pillugu 2014-mi Ukiakkut ataatsimiinnermi Inatsisartut pilersaarutaasumik aalajangiinissaannut misissueqqissaarnerit tunngaviliissapput. Sanaartornermut missingersuusiornermik sulineq Naalakkersuisunit aallartinneqarpoq, qanittukkullu inuiaqatigiinnut kinguneqarluartitsisinnaaneranik naliler-suinissaq pillugu suliassamik suliarinnittussarsiuussisoqassalluni. Tassani pilersaarutip nunap immikkoortua ataatsimut isigalugu pingaaruteqarnera misissorneqassaaq - inaarutaasumik aalajangiiniarnermi tamanna pingaaruteqarmat.

Qaqortup eqqaani mittarfimmik pilersitsisoqassasoq Inatsisartut 2014-mi aalajangiissappata maannamuugallartoq piffissaliussat takutippaat mittarfik nutaaq 2018-mi ingerlatsinissamut piaarersimassasoq.


Paasissutissat annertunerusut pillugit attavigiuk:Peqqissutsimut Attaveqarnermullu Naalakkersuisoq Steen Lynge Naalakkersuisumut allatsi Hanne Vibjerg aqqutigalugu oqarausaat: +299 34 66 05 imaluunniit e-mail: havi@nanoq.gl