Inissiat niuernermi akiusumut tunineqartarput

Ineqarnermut Naalakkersuisoq: »Attartortumiit piginnittumut aaqqissuussaq« isumassarsiatsialaavoq

Nuummi Qinngorpumi inissiat 300-uusut, 2009-mi pilersaarusiorneqartut, 60 procentii aallartinnermili attartortunngortussanit tiguneqarnissaat pilersaarutigineqarpoq. Taamaalilluni illoqarfiup immikkoortua, inissianik attartortittakkanik inissianillu nammineerluni pigisanik akuleriissitsiviusoq matumani pineqarpoq.
Piffissap naalakkersuisuuffiusup kingulliup ingerlanerani taamani Naalakkersuisuusoq aalajangerpoq, inissiat attartortunut tunineqassanngitsut, kisiannili inissiatut attartortakkatut ingerlaannarlutik Namminersorlutik Oqartussat sulisuinut atorneqassasut.
Maannakkut Naalakkersuisuusut attartortunut iluaqutaasumik nuannaarutaasumillu suliap aallaqqaammut ingerlaneranut uterteqqinneqarnissaa kissaatigaat. Tamanna tunngavigalugu Naalakkersuisut aalajangerput, maannakkut attartortuusut inissianik attartukkaminnik pisinissamut periarfissinneqassasut.
Ineqarnermut, Pinngortitamut Avatangiisinullu Naalakkersuisoq, Miiti Lynge:
- Siumut, Atassut aamma Partii Inuit akornanni naalakkersuisooqatigiinnissamut isumaqatigiissummi ersarissumik allassimavoq, attartortut inissianik attartukkaminnik piginnittuulernissamut periarfissinneqassasut, taamaalillutillu namminneerlutik angerlarsimaffimminni naalagaalissasut. Nammineerluni pigisaq paarilluarneqarnerusartoq kialluunniit nalunngilaa.
Inissiat niuernermi akiusut tunngavigalugit akillit
Miiti Lynge:
- Tusagassiorfinnit oqaatigineqartutut inissiat tamanut ammasumik tuniniarneqarnissaat matumani pineqanngilaq. Attartortut pisisinnaatitaanertik atorsinnaavaat, allanit atorneqarsinnaanani. Aamma oqaatigineqarpoq, inissiat niuernermik akiusut tunngavigalugit tuniniarneqartussaammata, attartortut pisinissamut kajumissuseqalersinnaanngitsut. Tamanna ilumuunngilaq. Attartoraanni ileqqaartoqarsinnaanngilaq. Kisiannili inissiaq najugaq pisiarigaanni, taarsigassarsianut taarsersuineq ilutigalugu inissiami ileqqaartoqartarpoq.
- Niuernermi akiusut tunngavigalugit inissianik tunisinissaq kukkunerunngilaq – taamaanngilluinnarpoq. Nuummi sulianik ingerlataqartut allat aamma inissiaatiminnik niuernermi akiusut tunngavigalugit tunisisarput, tamannalu illunik tuniniaasartut nittartagaanni tuniniaanermullu najoqqutassani ersarissumik takuneqarsinnaavoq. Inissiat niuernermi akiusut tunngavigalugit akigititaasut inorlugit tunineqartassappata, tamanna inissianik niueruteqarnermut qajannarsititsisussaavoq. Tamatumani kikkut tunisisuunersut apeqqutaanngilaq.
Maannakkut attartortuusut ukiap ingerlanerani pisinissamut neqerooruteqarfigineqarlutik attaveqarfigineqassapput. Inissianik najukkaminnik pisiniarlutik aalajangertut piginnittunngortussaapput, aammalu illuutillit peqatigiiffiinut ilaasortanngortussaallutik. Pisinissamik kissaateqanngitsut piumasaqaatit allanngortinnagit attartornertik ingerlatiinnarsinnaavaat. Erseqqissassallugu pingaaruteqarpoq, illuni nunaminertat ataatsimoorussat, illut qalliutaat teknikkimullu atortut ataatsimoorussat aserfallatsaaliorneqarnerinik illuutillit peqatigiiffii isumaginnittussaammata. Tamatumani inissiap piginnittumit atorneqarnera attartortitaaneraluunniit apeqqutaatinneqassanngilaq.