Eqqartuusiviit pinerluttaaliuisitsillunilu suliat nukittorsarnissaat pisariaqarpoq

Ilaqutariinnermut Inatsisinillu Atuutsitsinermut Naalakkersuisoq Martha Lund Olsen, ullumi 7. august 2013, danskit inatsisinik atuutsitsinermut ministerianik Morten Bødskovimik ataatsimeeqateqarpoq.

Ataatsimiinnermi apeqqutit makku eqqartorneqarput:

  • Pinerluttarnernik pinaveersaartitsiniarneq pinerluttaaliuisitsiniarlunilu suliat.
  • Kalaallit Nunaanni saammaasseqatigiinnissamut siunnersuisoqatigiinnik pilersitsinissaq
  • Kredsrettit pillugit suliap killiffia.
  • Isertitsivinniittut katsorsartinnissamik neqeroorfigineqartalernissaannut suliap killiffia.
  • Pinerlunneq pillugu inatsisip nalilersornissaanut pilersaarut.

"Eqqartuussivinni suliassat killilerneqarsinnaanerat aammalu pinerluttaaliuisitsilluni suliat qanoq isilluni pitsanngorsaaffigineqarsinnaaneri pillugit inatsisinik atuutitsinermut ministerip siunnersuutissaminik saqqummiinissaa isumalluarfigeqaara”, taamak ataatsimiinnerup kingorna Martha Lund Olsen oqarpoq.

Massakkorpiaq kredsret-ini suliassat 8.000-it missaaniipput. Suliassat annertuut siunissaq isigalugu qanoq isilluni ikilisarneqarsinnaanissaat pillugit inatsisinik atuutitsinermut ministerip siunnersuuteqarnissaa Martha Lund Olsenip pingaartilluinnarpaa. Apeqqut Kalaallit Nunaanni Eqqartuussiveqarneq pillugu Siunnersuisoqatigiit Tasiilami 15. aamma 16. august ataatsimiinnerani eqqartorneqassaaq.

Morten Bødskovip aamma Martha Lund Olsenip isumaqatigiissutigaat ”Angerlarsimaffinni nipiliortarnerit pinaveersaartinniarlugit oqaloqatiginnittarnissaq”-imik taallugu Politiit suliniutaat pinerluttarnerit ikilisinniarlugit suliniutinut pitsaasunut assersuutissaqqissuusoq, taassumalu nuna tamakkerlugu suliniutigineqalernissaa suleqatigiissutigineqassasoq.

Annertunerusumik paasisaqarusukkuit, attavigiuk:

Naalakkersuisup allattaa, Malene Jensen
Mobil +299 53 93 71, Martha Lund Olsenip apersorneqarnissaa siunertaralugu