Tasiilami meeqqat ilaqutariillu sullinneranni 2013-mi piginnaanngorsaanissaq

Ulloq 15. august Ilaqutariinnermut Inatsisinillu Atuutitsinermut Naalakkersuisunut ilaasortap Martha Lund Olsen-ip Tasiilami Meeqqanut Ilaqutariinnullu Immikkoortortaqarfik taamatullu Meeqqanut Ilaqutariinnullu Sullissivik ataatsimeeqqatigisimavai.

Ullormut oqaluuserineqartut ilaatigut makkuusimapput:

• Naalakkersuisunut ilaasortap ilisimatitsissutigivaa ilaqutariinnut, meeqqanut inuusuttunullu tunngatillu suliniutitik.
• Aqutsisoqarfimmi pisortap ilisimatitsissutigivaa Meeqqanik Ilaqutariinnillu immikkoortortaqarfiup taamatullu Meeqqanut Ilaqutariinnullu Sullissiviup ulluinnarni unammillertagaat, tamatumanilu pitsaaliuilluni ataatsimoorlutik iliuuseqaatigisartakkatik.

"Nuannaarutigeqaara maluginiarakku Tasiilami meeqqanik ilaqutariinnillu sullissineq ilorraap tungaanut ineriartortinneqartuarmat. Mikinngitsumik iluarisimaarpara sulisut ilinniarsimasut piffimmiillu suleqataasut piginnaasatik kattullugit Tasiilami isumaginninnikkut suliniutissat aamma uagut nalunngisagut isumaginiartarmassuk taamatut Martha Lund Olsen-i ataatsimeereernerup kingorna oqaaseqarpoq.

Tasiilami inuit 60-t sinnerlugit amerlassuseqartut imigassamut katsorsarneqarnissaminnut utaqqipput. Tamatumani Martha Lund Olsen-ip pingaartippaa katsorsaasarnerup qaffassaavigineqarnissaa, taamaasiornikkut isumaginninnikkut sullissisut periarfissagissaarnerulissammata ilaqutariit ulloq manna tikillugu isumaginnikkut aningaasarsiornikkullu artorsaateqartut kivinneqarsinnaaleqqullugit. Tamatumanimi imigassaq nakkaattoornissamut aqqutaanerpaasarmat.”

”Meeqqanut Ilaqutariinnullu Immikkoortortaqarfiup taavalu Meeqqanut Ilaqutariinnullu Sullissiviup illumi ataatsimit aallaaveqarlutik sullissisilersimanerat periarfissiilluarsimavoq unammilligassat sulissuteqarfiginissaanut. Aamma tamanna paasisimasat kattullugit suliniuteqarnerit ataavartumik aaqqissuussiffigineqarnissaanut periarfissiilluarsimavoq – tamatumani aamma sullissisut piginnaanngorsarneqarnissaat eqqarsaatigalugu. Qilanaarpunga Tasiilami isumaginninnikkut sullissinerup ineriartortinneqarneranut malinnaasinnaanissannut”, taamatut naggasiilluni Martha Lund Olsen-i oqaaseqarpoq.

Martha Lund Olsen-ip Tasiilamiinnerminut atatillugu aammattaaq meeqqanut ulloq unnuarlu angerlarsimaffii utoqqaat illuat pulaarsimavai, Nunatsinnilu Eqqartuussiveqarnikkut Siunnersuisoqatigiit naapissinnaassimallugit.

Paasissutissanik sukumiinerusunik pissarsiniaruit, attaveqarfiuk:

Naalakkersuisup allattaa Malene Jensen
Mobil 53 93 71, taanna aqqutigalugu Martha Lund Olsen pissarsiariniarneqarsinnaavoq.