Umiarsuit angallanneri silallu pissusia Naalakkersuisut aallutilerpaat

Skibsfart og klima

Silap pissusiata allannguutaasa umiarsuit angallannerinut sunniutaanik misissueqqissarnernik aallartitsiniarlutik Naalakkersuisut aalajangerput. Misissueqqissaarnerni silap pissusiata allannguutaannut atatillugu unammilligassat periarfissallu aallunneqassapput.

Silap pissusianik ilisimatusartut akornanni nunani issittuni, taamaalillunilu aamma Kalaallit Nunaanni silap pissusiata allanngoriartorneri sukkasoorujussuarmik ingerlasut annertuumik isumaqatigiissutigineqarpoq. Kissakkiartorpoq, nittaalartarnera allanngorpoq, anorit sakkortusiartorput sermersuarlu ilorpariartorpoq. Silap pissusiata allannguutaasa sunniutaasa ersarissarneqarnissaa Naalakkersuisut kissaatigaat, taamaalilluta innuttaasutut allannguutit takkuttartussat piareersimaffigisinnaagatsigit.

Nunap angallannikkut ataqatigiinneranut umiarsuit angallannerat qitiulluinnarpoq, aammalu aalisarnermut taamatullu nassiussanik nioqqutissanillu assartuinermut pingaaruteqarluni.

Misissuinermi silap pissusiata allannguutai umiarsuit angallannerinut qanoq ilillutik pitsaasunik ajoqutaasunillu sunniuteqarnersut misissoqqissaarneqassaaq. Tamatumani assersuutigalugu umiarsuit angallavii nutaat, nunap avataani uuliasiornermi gassimillu ujarlernermi suliffissualiornissamut periarfissat ajornannginnerusut aammalu ukiup ingerlanerani sivisunerusumi illoqarfiit nunaqarfiillu ilaasa tikikkuminarnerulernerat annertuumik oqaluuserineqarpoq. Inuiaqatigiittut silap pissusiata allannguutaanut naleqqussaanissatsinnut periarfissatta pitsaanerpaanissaat Naalakkersuisut kissaatigaat. Allannguutissat ilimagisinnaasavut suunersut, taakkulu qanoq ilillutik inuiaqatigiitsinnut sunniuteqarsinnaanersut annertunerusumik ilisimagutsigit, tamatumunnga piareersarnissamut sakkussaqarnerulissaagut. Umiarsuit angallannerisa misissoqqissaarnerisigut, suliassaqarfik tamanna qanoq sunnerneqarpiartussaanersoq takussavarput. Taamaalilluta suliniutissat suut iluaqutaasumik aallartinneqarsinnaanersut takunissaannut periarfissarsissaagut.

Aamma silap pissusianut sunniutissat annikillisinniarlugit periarfissavut misissussavagut, taakkununngalu umiarsuit angallannerinit gassinik silamik kissakkiartortitsisartunik annikillititsisinnaanissamut periarfissaqarnersoq ilaatinneqassaaq.

Suliassaq Ineqarnermut, Pinngortitamut Avatangiisinullu Naalakkersuisoqarfiup aamma Peqqissutsimut Attaveqarnermullu Naalakkersuisoqarfiup akornanni suleqatigiiffiussaaq, ilaatigillu aamma Royal Arctic Line suleqatigineqassalluni.