Naligiissumik ineriartortitsinermut Naalakkersuisut pilersaarutaat

Narsami innuttaasunik ataatsimiisitsineq Narsami innuttaasunik ataatsimiititsinermik ornigarneqarluartumik Naalakkersuisut Kujataani angalaarnertik aallartippaat.

Kalaallit inuiaqatigiit naligiissumik assigiimmillu pisussaaffeqartumik ineriartortitsinermut Naalakkersuisut takorluugaat pilersarutaallu Jens-Erik Kirkegaardip, Nick Nielsenip aamma Martha Lund Olsenip saqqummiuppaat. Qinersiviusumi matumani suliffissaaleqineq malunnartumik annikillisinneqassaaq, inuussutissarsiornermilu suliniutit nutaat arlallit aallartisarneqassallutik.

Jens-Erik Kirkegaardip pingaarnertut iliuuseqarfissat pingasut erseqqissarpai:

Siullertut ukiut tullinnguuttut takkuttussat iluini aatsitassarsiornermi suliniutinik arlalialunnik aallartitsissaagut. Tassunga atatillugu tigussaasumik suliniutit tassaapput uranimik atueqqusinngilluinnarnerup atorunnaarsinnissaa aamma Inatsisartut 2013-imi ukiakkut ataatsimiinneranni suliniutinut angisuunut inatsisip iluarsinissaa.

Aappaattut takornariartitsinermi siuarsarnissamut angallannikkut aporfissaasut peernissaat sammissavagut.

Pingajuattut aningaasanut inatsimmi immikkut ittunik agguaassassani atugassiinikkut najugaqarfinni inuussutissarsiutitigut suliniutit sammineqassapput.

Kalaallit Nunaanni innuttaasunut tamanut inuunerup pitsaasup toqqissisimanartullu isumannaarnissaa Naalakkersuisut anguniagarisaat Martha Lund Olsenip naqissuserpaa. Inooqatigiiffiusumi angalasartuliornerup nunami tamarmi inooqatigiiffiusumi suliatigut piginnaasat nukittorsassavaat, immikkullu ilisimasaqarfiusutut siunnersorneqarnissamut innuttaasut pisariunnginnerusumik attaveqarnissaannik isumannaarissalluni.

Innuussutissarsiummik ilinniagaqarnermik inuusuttut amerlanerit aallartitaqarlutillu naammassisaqartarnissaat Nick Nielsenip erseqqissarpaa. Sungiusartarfissamik ajornartorsiut atuarfimmi sungiusartarfissatut periarfissat amerlanerit pilersinnerisigut, aammalu tamanut ammasumik suliarinnittussarsiortarnerni sungiusartarfeqarnissaanik piumasaqaateqartoqarnikkut aaqqiivigineqassaaq.

Ilinnialinngiffik nukittorsassaaq, ingammik nunaqarfinni isorliunerusunilu neqeroorutit ilinniartitaqarnermik ineriartorsaatit annertusarneqassallutik. Atuarfitsialammik suliaq nangissaaq, suliarlu tamanna meeqqat atuarfiini soqutigisaqaqatigiit tamarmik qanimut oqaloqatiginerisigut pissalluni.

Inatsisartut 2014-imi upernaami ataatsimiinnissaannut Naalakkersuisut ilinniagaqarnermut pilersaarummik nutaamik saqqummiussilersaartut Nick Nielsenip aamma oqaluttuaraa.