Nunat Avannarliit Killiit Siunnersuisooqatigiivi

Nick N 040613

Naalakkersuisoq Nick Nielsen Nunat Avannarliit Killiit Siunnersuisooqatigiivisa ukiumoortumik Narsarsuarmi ataatsimiinneranni peqataavoq

Naalakkersuisunut ilaasortap Nick Nielsen-ip Nunani Avannarlerni Killerni naalakkersuisut ukiumoortumik ataatsimiinnermi 19. – 20. august sinniisuuffigai.

Island-ip, Kalaallit Nunaata Savalimmiullu tamarmik Nunat Avannarliit Killiit Siunnersuisooqatigiivisa innersuussutaannut Narsarsuarmi ukiumoortumik ataatsimiinnissaq sioqqullugu akissutitik tunniuppaat, Naa-lakkersuisullu Nick Nielsen-ip tamanna malitseqartippaa ukiumoortumik ataatsimiinnermi oqaaseqarnermini.

Taassuma ilaatigut erseqqissarpaa Nunani Avannarlerni Killerni suleqa-tigiinnerup patajaallisarnissaanut tunngavissat ullumikkut ukiunut qassissunnguanut qaangiuttunut sanilliullugu pitsanngoriarsimammata. Kalaallit Nunanni illoqarfinnit arlaqartunit Islandimut toqqaannartumik timmisartukkut attaveqarnerup kingunerisimavaa, immitsinnut tikeraassagaangatta avaqqutaarerujussuaqqaarnata pisinnaalersimagatta. Takornarianut inuussutissarsiuteqartunullu nunarsuarmi tamaneersunut Island pisariitsumik aqqusaartagaalissaaq Kalaalliit Nunaannukarnermi, siornatigut Europa aatsaat aqqusaaqqaarneqartaraluarpoq. Matumunnga ilanngunneqassaaq islandip generalkonsulatia Nuummi ukioq manna ammarneqarnerata nunat taakku marluk akornanni attaveqarneq pitsaanerulersissammagu.

Taamatuttaaq Naalakkersuisup Nick Nielsen-ip oqaatigaa lagmandip ukioq manna Nuummut tikeraarnerata Nunani Avannarlerni Killerni ilaatigut inuussutissarsiuteqartut akornanni nutaanik attaveqalernissaq periarfississimammagu.

Ukiumoortumik ataatsimiinnermi inassutinut aqqaneq marlunnut suli sammineqartunut akissutit suliarineqarput, taakkunannga ilinniartitaanermut kultureqarnermullu affaat attuumassuteqarput. Inassutit ilaata piviusunngortinneqartumut assersuutigalugu taaneqassaaq Nunanut Avannarlernut Killernut Ullorititaat. Ulloq taanna Kalaallit Nunaanni malunnartinneqassaaq septemberip 14-ni Katuami.

”Nunat Avannarliit Killiit Siunnersuisooqatigiivi tassaapput nunat pingasut taakku inatsisartuisa akornanni suleqatigiiffiusut pingaarutillit, kisiannili aamma ilaasortanut oqaatigisariaqarpara, isumalluutit nunani atugassaasut suli killeqarmata, taamaattumik inassutit tamakkiisumik naammassiniartarnissaat naalakkersuisunut tamatigut pisinnaasarsimanngilaq” Naa-lakkersuisoq Nick Nielsen oqarpoq.

”Tamatumunnga atatillugu isumaqarpunga, Nunat Avannarliit Killiit Siunnersuisooqatigiit ilaatigut ukiumoortumik ataatsimiinnertigut sammisaqarlunilu ataatsimeersuartitsinertigut apeqqutit pingaarutillit assigiinngitsut naalakkersuinikkut sammineqartunut ilanngussisinnaasarmata. Tamanna annertuumik pingaaruteqarpoq ilaatigut nunani avannarlerni killerni naalakkersuisut sulinerannut ilassutaasarlutik” Naalakkersuisoq Nick Nielsen naggasiivoq.