Innarluutillit pillugit sapaatip akunnera

Innarluutillit pillugit sapaatip-akunnerani, tassalu sapaatip-akunnerani 41-mi eqqartorneqartussaq aalajangersimasoq tassaassaaq ”Qaratsakkut aanaartoornerup aamma taqqamik milittoornerup malitsigisartagai"

Utoqqaat arlaqartut, aammalumi Nunatsinni najugaqartut inuusunnerusut ukiut tamaasa qaratsamikkut aanaarttoortarput imaluunniit taqqamikkut milittoortarlutik. Taanna taaneqartarpoq apopleksi, eqqugaasumullu namminermut, ilaqutaasunut qaninnernut allanullu qanigisanut annertuumik kinguneqartarpoq.

Taamaammat IPIS/ Ilaqutariinnermut Inatsisinillu Atuutsitsinermut Naalakkersuisoqarfik Naalakkersuisoq Martha Luind Olsen siuttoralugu isumaqarpoq ukioq-manna sapaatip- akunnerani 41-mi innuttaasut taakkorpiaat taakkununngalu atugassarititaasut immikkut aalajangersimasumik sammineqassappata pissusissamisoortoq.

Martha Lund Olsen oqarpoq: ”Pingaaruteqarpoq eqqugaasup napparsimalernermi aallartinneraniit pisinnaasaminik annaasaminik sukkanerpaamik sungiusartinneqaqqilluni aallartitinneqarnissaa, taamaammat pingaaruteqarpoq piumassuseqarnissaq sungiusaqqinnerullu iluaqutaasinnaaneranik upperinninnissaq. Piffissami tassani avatangiisit qanigisat qiimmassaallutillu tapersersuinerat eqqugaasup ullut tamaasa sungiusarnissaanut qimmassaataassaaq, tamakkulu naggataatigut inuit ataasiakkaat pisinnaasaminnik katassimasaminnik ataasiakkaarlugit atoqqilersinnaanerannut pingaaruterqarpoq, taamaalillunilu inuunermini pitsaanerusunik atugaqarnissaat qulakkeerneqarsinnaalluni.”

Martha Lund Olsen nangilluni oqarpoq: ”Inassutigerusuppara Nunatsinni illoqarfinni nunaqarfinnilu paasisitsiniaasoqassasoq, oqaloqatigiittoqarluni oqallisigineqarlutillu pisariaqartitsisut ikiorserniarlugit qanoq pitsaanerpaamik ikiuisinnaaneq periarfissallu suuneri missorlugit – aporfiusinnaasut pivallaarnagit. Aamma inassutigerusuppara inuunerissaarnissaq sammineroqqullugu, tassuunakkut apopleksimik eqqorneqarsinnaaneq ingalassimatinneqarsinnaammat – tamanna pisinnaavoq pujortartannginnikkut, aalasarnikkut/qasujuillisaartarnikkut peqqinnartunillu nerisaqarnikkut. ”

Sapaatip-akunnerani 41-mi isumassarsiorfiusinnaasumik IPIS naqitanngualiorsimavoq, tassani ilaatigut paasisitsiniaalluni oqallititsillunilu ingerlatsinissamut isumassarsisoqarsinnaalluni.

Sapaatip-akunnerani sammisamut tunngasunik iliuuseqarnissanut aqqissuussinissanullu tapiissutissanik qinnuteqartoqarsinnaavoq uunga: IPIS/Ilaqutariinnermut Inatsisinillu Atuutsitsinermut Naalakkersuisoqarfik.

Qinnuteqaatit IPIS-imeeriissapput kingusinnerpaamik tallimanngorneq 13. september 2013:
IPIS@nanoq.gl imaluunniit IPIS. Postboks 970, 3900 Nuuk, fax : 3242898
Qinnuteqarnissaq pissaaq immersorlugu qinnuteqarfissaq uani aallugu: www.ipis.gl .

 

Qinnuteqarnermi immersugassaq

Oqallissaarut

Quppersagaq