Ammasumik ataatsimiisitsineq

True North Gemsip rubininut suliniutaa tusarniaassutigineqarluni tamanut ammasumik ataatsimiissutigineqalerpoq

Naalakkersuisut True North Gemsip Aappaluttumi rubininut suliniutaa pillugu Qeqertarsuatsiaani, Paamiuni aamma Nuummi tamanut ammasumik tusarniaallutik ataatsimiisitsinialerput.

Qeqertarsuatsiaat katersortarfianni ataasinngorneq augustip 26-anni nal. 19.00
Paamiut katersortarfianni marlunngorneq augustip 27-anni nal. 19.00
Nuummi Katuami ineqqaami sisamanngorneq augustip 29.-anni nal.19.00

Naalakkersuisut tamanut ammasumik tusarniaallutik ataatsimiisitsinissaannut takkuttoqarluarnissaanullu neriuuteqarput.

”Tamanut ammasumik tusarniaalluni ataatsimiisitsinermi Qeqertarsuatsiaat eqqaanni siunissaq sammineqassaaq. Naalakkersuisut kissaatigaat aamma politikkeraat aatsitassarsiornerup ineriartortinneranut inuiaqatigiit peqataatinnerussallugit. Tamanut ammasumik tusarniaalluni ataatsimiisitsinermi True North Gemsip suliniutaanik nalilersuinerit saqqummiunneqassapput, suliniullu suliffissaqarnikkut periarfissanik nutaanik pilersitsissasoq aamma inuiaqatigiit aningaasaqarneranut sunniuteqarluassasoq nalilerneqarpoq, Inuussutissarsiornermut Aatsitassanullu Naalakkersuisoq Jens-Erik Kirkegaard oqarpoq.

Tamanut ammasumik tusarniaalluni ataatsimiisitsinerit Kompetence Komapagnietimit aqunneqartassapput, tassa arlaannaanulluunniit attuumassuteqanngitsutut ataatsimiinnerni aqutsisussatut toqqagaasimagamik.

Tamanut ammasumik tusarniaalluni ataatsimiisitsinerni rubininut suliniut pillugu nalunaarusiat aallaavigineqartassapput, tassa avatangiisinut sunniutaasussanik nalilersuineq aamma inuiaqatigiinni piujuartussamik iluaqutaasumik sunniutaasussanik nalilersuineq aallaavigineqassallutik.

Tamanut ammasumik tusarniaaneq septemberip 12-anni nal. 12.00-mut killeqarpoq. Tusarniaassutigineqartut www.naalakkersuisut.gl-imi takuneqarsinnaapput. Tusarniaanermilu akissutit Aatsitassanut Ikummatissanullu Aqutsisoqarfimmut nassiunneqassapput, postboks 930, 3900 Nuuk imaluunniit e-mail bmp@nanoq.gl -imut nassiullugit.

Tamanut ammasumik tusarniaanerit pillugit paasissutissanik pisariaqartitsiguit attavigiuk: Naalakkersuisoqarfimmi pisortap allattaa Konkordia Gabriel +299 34 56 66