Pilluaqqussut - atualeqqaarneq

 

”Naalakkersuisut sinnerlugit nuannaarutigaara meeqqat ilaqutariippassuillu nunatsinni sumiluunniit sap.ak. una atualersoortut pilluaqqusinnaagakkit. Meeqqamut ilaqutaannullu aamma inuiaqatigiinnut ulloq pingaaruteqartorujussuusarpoq meerartagut atualeraanngata. Tamannalu pingaartittariaqarparput, nunamimi najugaqaratta meerartatta inuusuttortattalu atuarnissaat kingornalu ilinniarnissamut periarfissaqarnerat nalinginnaasuusoq.

Atuartut tamarmik ulluni makkuni 1. klassemi atualeqqaartut atualernertik pissanganartillugu, soqutiginartillugu ilikkangaqarusussuseqarlutillu aallartippaat. Uagullu inersimasuusutut – angajoqqaat ilinniartitsisullu, akisussaaffigaarput taanna atuarnermik nuannarisaqarneq meeqqat atuartuunerminni atungariinnassangaat. Tassami toqqissillutik ilikkangaqarusussuseqarlutillu inissisimagunik periarfissinneqassammata ilikkangaqarluarnissamut, kingorna ilinniaqqinnissaminnik ammaassisussamik.

Uanga nammineerlunga qilanaareqaara ukiup atuarfiusup ingerlanerani angajoqqaanik ilinniartitsisunik, ilinniagaqartunik allanillu arlaatigut atuarfeqarnerup ingerlanneqarnerani attuumassuteqartunik oqaloqatiginnittarnissara, qanoq Ilinniartitaanerup pilersaarusiornerani II-mi Atuarfitsialaap ineriartorteqqinneqarnissaa akuliutsinnissaalu isumannaarniarnissaa pillugu.” 

 

Inussiarnersumik inuulluaqqusillunga

 

Nick Nielsen

 

Paasisaqarnerorusukkaanni attavigineqarsinnaavoq naalakkersuisumut allatsi Bent Møller, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfik; oqarasuaat: +299 54 84 59.