Kujataanut angalaneq

Innuttaasut peqataatinneqarnissaat Naalakkersuisut aalluppaat

Ulluni 20. – 23. august 2013 Naalakkersuisut Kujataani angalangaatsiarniarput. Angalanermi peqataassapput Inuussutissarsiornermut, Aatsitassanut Suliffeqarnermullu Naalakkersuisoq Jens-Erik Kirkegaard, Ilinniartitaanermut, Ilageeqarnermut, Kulturimut Naligiissitaanermullu Naalakkersuisoq Nick Nielsen kiisalu Ilaqutariinnermut Inatsisilerinermullu Naalakkersuisoq Martha Lund Olsen. Angalaqatigiit makku tikeraassavaat; Narsaq, Alluitsup Paa, Nanortalik, Qaqortoq, Igaliko aamma Qassiarsuk.

”Ukiaq manna annertuunik aalajangiiffissaqarfiuvoq. Ukiaanerani ataatsimiinnermi ilaatigut oqallisigineqassapput Annertuumik suliaqarnermi Inatsisip allanngortinnissaa kiisalu akuersaanngilluinnarnerup taamaatinneqarnissaanut tunngaviusumik aalajangernissamut siunnersuut. Sammisat tamakku qineqqusaarnermi oqallisigineqangaatsiarput maannalu piviusunngortinniarneqalissallutik”, Jens-Erik Kirkegaard oqarpoq, erseqqissaatigaalu Naalakkersuisunut pingaaruteqartoq sammisat tamakku pingaaruteqartut innuttaasunut toqqaannartumik oqallisigineqarnissaat.

Kujataani innuttaasunik oqaloqateqarnermi aallaaviussapput piiaanissamut akuersissut London Mining-imut naammassineqangajalersoq, pilersaarutillu allat marluk maanna tusarniaassutigineqarput – tassaappullu Qeqertarsuatsiaani rubin-isiorluni pilersaarut kiisalu Kujataani Killaavaat eqqaanni saffiugassat qaqutigoortut.

Kujataani ataatsimiinnissanut pilersaarutit imartuut sammisat aatsitassanut tunngasut saniatigut suliffissaaleqinermik akiuiniarnerup, ilinniartitaanerup kiisalu ilaqutariinnermut tunngasut aallunneqarnissaat.

Innuttaasunik ataatsimeeqateqarnissanut pilersaarut:

20. august Narsap Katersortarfiani nal. 19.00 - 21.00

21. august Alluitsup Paa-ni Illu Sullivimmi nal. 11.00 - 12.30, Nanortallip Katersortarfiani nal 19.00 - 21.00

22. august Qaqortumi Puilasoq nal. 19.30 - 22.00

23. august Igaliko-mi Katersortarfik nal. 11.30 - 12.30, Qassiarsunni Café Brattahlid nal 14.30 - 15.30


Annertunerusumik paasisaqarniaraanni attavigineqassaaq: Immikkoortortami pisortaq Tina Jensen, Inuussutissarsiornermut, Aatsitassanut Suliffeqarnermullu Naalakkersuisoqarfik.