Aanngajaarniutit pillugit isumasioqatigiinneq

Nunat Avannarliit aanngajaarniutit pillugit isumasioqatigiinnissaanni Kalaallit Nunaat qaaqqusisuuvoq

Nunat Avannarliit aanngajaarniutit pillugit 2013-imi isumasioqatigiinnissaat Nuummi aggustip 27-aniit 29-anut ingerlanneqassaaq. Nunatsinnit Nunanilu Avannarlernit peqataanissamut immikkut qaaqqusat 65-it naapillutik misilittakkanik paarlaasseqatigiillutillu imigassamik ikiaroornartunillu atornerluinermut pitsaaliuinermut atatillugu suliniuteqarnerit periaatsillu oqaluuserissavaat.

Nunat Avannarliit aanngajaarniutit pillugit isumasioqatigiinnissaanni siunertaasoq tassaavoq, nunani avannarliit aanngajaarniutinut tunngatillugu ilisimatuutut misissuineq, pitsaaliuinikkut katsorsaanikkullu suleqatigiinnerup annertusarneqarnissaa nukittorsarneqarnissaalu. Isumasioqatigiinnermut Nuummi Hotel Hans Egedemi ingerlanneqartussami Peqqissutsimut Attaveqarnermullu Naalakkersuisoqarfik aamma Kommuneqarfik Sermersooq qaaqqusisuupput.

- Imigassamik hashimillu atornerluineq Kalaallit Nunaanni innuttaasut akornanni peqqinnissakkut ajornartorsiutit annersaraat, taannalu inuiaqatigiit peqqissuunissaannut pilersaarutitsinni Inuuneritta II-mi suliniutissat pingaarnersaraat. Nunat Avannarliit Aanngajaarniutit pillugit isumasioqatigiinnissaata pinaveersaartitsinermut tunngasunut suleriusissatsinnut tunngatillugu nunanik avannarlernik allanik pingaarutilimmik siunersiueqateqarnissamik periarfississavaatigut”, oqarpoq Peqqissutsimut Attaveqarnermullu Naalakkersuisoq Steen Lynge.

Isumasioqatigiinneq imatut katitigaavoq isummernissamut tunngavissiamik aanngajaarniutit pillugit ilisimatuutut misissuinermit sulinermillu ilisimasanik nutaanerpaanik. Pitsaaliuinermut suleriusissaq pingaarneq aalajangersimasumik suliniutit aanngajaarniutillu pillugit misissuinerit saqqummiussinissamut programmimi tamarmiusumi ullup affaanik Kalaallit Nunaat periarfissinneqarpoq.

Programmimi sammineqartussat allat tassaapput: Suliniutinut malitseqartitsineq, siusinaartumik akuliunneq, innuttaasut aanngajaarniutinut isumaat, ikiaroornartunut tunngatillugu periaatsit. Peqataasut ilaatigut tusarfigissavaat Norgimi ”qaammatit qaqortut” (“qaammatit imigassartorfiunngitsut”), Islandimi atuarfinni peqqinnissamut politikki aamma Qallunaat Nunaanni festertarnerit pillugit paasititsiniaanerit.

Nunat Avannarliit aanngajaarniutit pillugit isumasioqatigiinnisssaannut atatillugu programmi nittartakkami: www.peqqik.gl takuneqarsinnaavoq.

Tusagassiorfiit aallartitaat isumasioqatigiinnermit tusagassiinissamut tikilluaqquneqarput.


Paasissutissat sukumiinerusut peqqinnissaq pillugu siunnersorti Lisa Christiansen oqarasuaatikkut (+299)
34 66 50 imaluunniit e-mailikkut lich@nanoq.gl

imaluunniit Peqqissutsimut Pitsaaliuinermullu pisortaq, Line Dalentoft oqarasuaatikkut: (+299) 55 24 93 imaluunniit e-mailikkut: lida@sermersooq.gl aattavigalugit pissarsiarineqarsinnaapput.