Naalagaaffeqatigiinnermi siulittut ataatsimeeqatigiinnerat

Kaj, Aleqa og Helle

Ministeriuneq Helle Thorning-Schmidt, Lagmand Kaj Leo Holm Johannesen Naalakkersuisullu Siulittaasuat Aleqa Hammond ullumi ulloq 29. august naalagaaffeqatigiinneq pillugu ukiumoortumik, ukioq manna Danmarkimi ingerlanneqartumi, ataatsimiipput.

Naalagaaffeqatigiinnermi susassaqarfiit ataatsimoorfiusut Naalakkersuisut Siulittaasuata, Statsministerip Lagmandillu eqqartorpaat.

Paasisassarsiorluni angalaneq aamma ingerlanneqarpoq, Mønimi, Vordingborgimi kiisalu ministeriunerup aasarsiortarfiani Bogømiittumi.

Aleqa Hammond ima oqaaseqarpoq:

“Ukiuni ukunani assigiinngitsutigut suliniuteqarnitsinni naalagaaffeqatigiinnermi ataatsimiittarnerit pingaaruteqarluinnarput. Namminersornerup eqqunneqarnerata kingunerisaasa ilagaat susassaqarfinnut arlalinnut isumaqatigiissusiorsinnaanernut piginnaatitsissutit, naalagaaffeqatigiinnerup iluani ataqatigiissumik suleqatigiinnissatsinnut pisussaaffiliisut. Issittup soqutigineqarnerata annertusiartortup peqqutigalugu avammut suliniutigut ataqatigiissarnissaat pingaaruteqarpoq.

Issittumi Siunnersuisoqatigiit aamma eqqartorsimavarput, ataatsimoorlutalu angusaq nuannaarutigalutigu. Issittumi Siunnersuisoqatigiit suleqatigiinnerani tamakkiisumik peqataaqqilernerput naalagaaffeqatigiinnerup Issittoq pillugu suleqatigiinnermi periarfissai annertuumik nukittorput. Nunarsuarmiut Issittoq pillugu suleqatigiinnerani Nunatta tusaaneqarnissaa Nunatsinnut Danmarkimullu pingaartuteqarluinnarpoq.

Savalimmiut Nunattalu Nunani Avannarlerni suleqatigiinnermi peqataasarnerat pillugu aamma nuannersumik eqqartueqatigiinneq ingerlanneqarpoq. Ministeriunerup nunat namminersortut nunani avannarlerni statsministerit aasaanerata nalaani ataatsimiittarnerannut peqataasarsinnaanissamut apeqqut, suleqatigiinnerup nukittorsarneqarnissaa siunertaralugu, Nunat Avannarlernut qaqinniarlugu suliniuteqarumavoq.”

Annerusumik paasisaqarniaraanni attavigineqarsinnaapput:

Pisortaq Kai Holst Andersen, tlf. +45 40178293
Naalakkersuisumut allatsi Tina Davidsen, tlf. +45 50518773