Miiti Lynge Tunumi

 

Naalakkersuisup Miiti Lyngep ulluni makkunani danskit ministeriini suleqatini Silap Pissusianut, Nukissiuuteqarnermut, Illuuteqarnermullu Ministeri Martin Lidegaard Zackenbergimi ilisimatusarfik tikeraarsimaqatigaa.

Ministerit tikeraaqatigiinnerminni ilisimatusarfinni, Namminersorlutik Oqartussanit pigineqartuni, aammalu Århus Universitetimit ingerlanneqartuni silap pissusianik misissuinerit paasisaqarfigaat. Aammattaaq tikeraarnermi silap pissusia pillugu Danmarkip aamma Kalaallit Nunaata akornanni suleqatigiilluarnerup ineriartorteqqinneqarneranut sinaakkutissat taperserneqarput nukittortinneqarlutillu. Silap pissusianut suliassaqarfik nunatsinnit tiguneqarsimavoq, kisiannili FN-ip ataani silallu pissusianik ilisimatusarnerup iluani nunat tamalaat isumaqatiginninniartarnerinut peqataasarneq pillugu Danmark qanittumik suleqatigineqarpoq.

Ilaatigut Pinngortitaleriffimmi aamma Asiaq-mi ilisimatusartut Zackenberg aamma Daneborg aallaavigalugit silap allannguutaanik, taakkulu nunani issittuni pinngortitami ataqatigiinnernut sunniutaanik nakkutilliisuupput, taakkununngalu silap pissusiata allannguutai qanoq nunani issittuni imartanut aammalu Tunumi naasunut uumasunullu sunniuteqarnersut ilaatinneqarput, taamaalillutillu nunap iluani nunanilu tamalaani silap pissusianut suliniuteqarnermi ilisimasassanik pingaarutilinnik pissarsiniarnermut tapertaallutik.

Miiti Lynge oqarpoq: ”Silap Pissusianut, Nukissiuuteqarnermut Illuuteqarnermullu Ministerip Martin Lidegaardip suleqatigilluakkama naapinnera nuannaarutigaara, aammalu ilisimasat annertuut, Kalaallit Nunaata Zackenbergimi sulinermini nunani tamalaani silap pissusianik ilisimatusarnermi tapersiissutigisai tulluusimaarutigaakka. Ukiuni makkunani Kalaallit Nunaat eqqumaffigineqartorujussuuvoq, silap pissusiata allannguutai qaninnerpaalluta misigisinnaagatsigit. Ilisimasat maani pinngortut silap allannguutaasa nunatsinnut qanoq sunniuteqarnerinut asseqanngitsumik paasissutissiipput, tamatumalu peqatigisaanik nunarsuarmi silap pissusianut sunniutit pitsaanerusumik paasineqarnissaanut tapertaallutik.

Tikeraarsimaninni sulinerup qanoq ingerlasarnera takussallugu periarfissarsivunga; maani silap pissusiani qanorpiaq pisoqarnersoq uuttortarneqartarpoq, tamannalu ilisimatusarnermut tapertaavoq pingaarutilik.”

Naalakkersuisup ilassutigalugu oqaatigaa, silap pissusia pillugu ajornartorsiutit Naalakkersuisunit ilungersuunneqartorujussuusut, ilaatigullu Ilulissani erngup nukinganik innaallagissiorfissarsuup, nukissiuutinik ataavartunik pingaartitsilluarnitsinnut tapertaasussap ammarnissaa oqaatigalugu. ”Erngup nukinganut amerlasuunik aningaasaliissuteqartarnitta kingunerisaanik ukioq manna pisortat nukissiuutinik pilersuinerisa 70%-iata nukissiuutinit ataavartunit pissarsiarineqarsinnaalernissaa angussavarput. Kalaallit Nunaata nunarsuarmi silap pissusianut akisussaaqataanini pimooruppaa.”

Attaveqarfissaq:
Apeqqutissaqarnermi attaveqarfissaq: Naalakkersuisoq Miiti Lynge oqarasuaat: (+299) 345000. email:
iaan@nanoq.gl

Tunuliaqutaq: Silap Pissusianut Nukissiuuteqarnermullu Immikkoortortaq, oqarasuaat: (+299) 345000 attaveqarfigineqassaaq.