Steen Lyngep Mittarfeqarfiit pilluaqqungaarpai

Ukioq manna Mittarfeqarfiit ukiut 25-inngortorsiorput, tassungalu atatillugu Peqqissutsimut Attaveqarnermullu Naalakkersuisup, Steen Lynge-p ingerlatsivik sulisuilu nalliuttorsiornerannik pilluaqqungaarpai:

- Mittarfeqarfiit Nunatsinni qitiulluinnartumik inissisimasut suliffeqarfiit ilagaat. Nuna tamakkerlugu sumiiffinniinnermigut, Mittarfeqarfiit piffinni arlalissuarni inuiaqatigiinni ingerlatsinerpassuit ingerlanneqarnissaat akisussaaffiliussimavaat, oqarpoq Steen Lynge, imalu nangilluni:

- Mittarfeqarfiit niuerfinni piumasaqaatit ajornartorsiorfiusaraluaqisut suliassatigut annertusiartornissaq piginnaasaqarfigisimavaa, aammalu suliffeqarfittut nutaaliatut annertuutut ineriartorsinnaasimalluni. Ineriartorneq tamanna sulisunut pikkorissuseqarluarlutillu peqataalluarnermikkut, suliffeqarfiup anguniagai anguniarlugit ukiut ingerlanerini suliniuteqarluarsimanerannik tunngaveqarpoq.

- Nuannaarutigeqisannik, maluginiarpaara, suliniuteqarneq tamanna suli ullumikkut ingerlanneqartuarmat. Qularinngilara, uagut aammattaaq ukiut 25-it qaangiuppata misigissagipput Mittarfeqarfiit suliffiussasoq piginnaasaqarfiusoq inuiaqatigiinnillu atatitsisoq, kikkut tamarmik nunatsiniittut tulluusimaarutigisinnaasaat.


Paasissutissanut allanut atatillugu attaveqarfissaq: Peqqissutsimut Attaveqarnermullu Naalakkersuisoq Steen Lynge, Naalakkersuisup allattaa Hanne Vibjerg oqarasuaatikkut: +299 34 66 05 e-mail-ikkulluunniit: havi@nanoq.gl