Isertitsivimmiinnissamut utaqqisut

Kalaallit Nunaanni eqqartuussivinni suliassat qaleriiaatilersarnerat isertitsivinniinnissaminnut utaqqisut ikilisittarpai

Danskit kalaallillu tusagassiorfiisa arlallit 12. august 2013-imi sammivaat Kalaallit Nunaanni isertitsivimmiittussanngorlugit eqqartuussat isertitsivimmiinnissaminnut utaqqisariaarussimasut.

 

Ilaqutariinnermut Inatsisinillu Atuutitsinermut Naalakkersuisup Martha Lund Olsenip Inatsisinik Atuutitsinermut Ministeriaqarfimmik suleqateqarneq iluarisimaarpaa, tamatuma kingunerisaanik innuttaasut pinerluuteqarsimanertik pissutigalugu eqqartuunneqarsimasut eqqartuunneqareernermik kinguninngua pillaatissinneqartalermata.

 

”Inatsisinik Atuutitsinermut Ministeriaqarfimmik ukiuni kingullerni suleqateqarnitsinni pitsaasunik angusaqartarsimavugut". Ilaatigut tamatuma kingunerisaanik innuttaasunut sakkortuumik pinerluuteqarsimasunut 2017-imi matoqqasumik parnaarussivimmik pilersitsissaagut, soorluttaaq Kalaallit Nunaanni saammaasseqatigiinnissamut siunnersuisoqatigiinnik pilersitsinissaq pillugu isumaqatiginninniarnerit pitsaasut ingerlanneqartut”, taamak oqarpoq Martha Lund Olsen.

 

Taamaakkaluartoq Martha Lund Olsenip erseqqissaatigaa, inatsisinik atuutitsinermut tunngasut eqqarsaatigalugit suli annertuunik unammilligassaqartoq, taakkulu alaatsinaaqqissaarneqassasut. Kalaallit Nunaanni eqqartuussivinni suliassat pingaarutillit massakkut 8.000-it missaanniipput, eqqartuussiviillu piareersimanngillat piffissami qaninnerusumi tamakkuninga suliaqarnissaminnut.

 

”Isertitsivinni inissat annertusisimanerat pitsaasuuvoq. Taamaakkaluartoq ilisimassavarputtaaq eqqartuussivinni suliassat pitsaanerusumik sukkanerusumillu suliarineqartalernerisigut isertitsivinni inissanik pisariaqartitsineq annertuseqqissammat", oqarpoq Martha Lund Olsen.

 

Eqaartuussivinni suliassarpassuit uninngaannalersut Martha Lund Olsenip aamma Inatsisinik Atuutitsinermut Ministerip Morten Bødskovip 7. august 2013 ataatsimeeqqatigiinneranni eqqartorneqarput. Apeqqutit tassunga tunngassuteqartut Kalaallit Nunaanni Eqqartuussiveqarneq pillugu Siunnersuisoqatigiit Tasiilami 15. aamma 16. august ataatsimiinneranni eqqartorneqassapput.

 

 

Naalakkersuisumut attaveqarniaraanni:

 

Naalakkersuisup allattaa, Malene Jensen, Mobil 00299 53 93 71