KNI A/S-imi ileqquusumik ataatsimeersuarneq

KNI A/S-ip ukiumi angusai naammaannartut – KNI A/S-imi ileqquusumik ataatsimeersuarneq

Ukiumi angusat akileraarutit ilanngaatigereerlugit 35 mio. kroniupput, taakkualu siorna angusat annertoqatigaat. KNI A/S-ip ukiup aallartinnerani naatsorsuutigaa 80-100 mio. koruunit angusarineqassasut ukiullu qiteqqunnerani nalunaarusiami naatsorsuutigisat 100-110 mio. koruuninut amerlineqarput. Angusat allaanerunerat pingaarnerusutigut pissutsinut marlunnut tunngatinneqarsinnaapput. Siullermik ingerlatseqatigiiffimmit aningaasat amerlanerungaartut avataaneersunit aningaasartuutinut atorneqarsimapput, taakku ukiup siulianut sanilliullugit 30 mio. kroninik qaffassimapput, ilaatigut avataaneersunik siunnersortinut. Aappaattut nioqqutissanik tuniniarneqarsinnaanngitsunik 25 mio. kronit missaanniittunik nalikilliliisoqartariaqarsimavoq.

Angusat naammaginanngillat. Tassunga tunngatillugu Aleqa Hammond oqarpoq: ”Aktiaateqarluni ingerlatseqatigiiffinni Namminersorlutik Oqartussanit pigineqartuni allanngoriartornerit malinnaavigeqqissaarpagut naammaginanngilarlu angusat ukiup qiteqqunnerani nalunaarusiami ilimagineqartunit taama annertutigisumik allaanerummata. Ingerlatseqatigiiffimmik aqutsisunit siumut naatsorsuutigineqarsimasariaqaraluarpoq, naatsorsuutigisatut angusassat anguneqarsinnaanavianngitsut ukiup qiteqqunnerani nalunaarusiap saqqummiunneqarneranut atatillugu."

Siulersuisut siulittaasortaarput
Angusat naammaginannginnerat pissutissaqalersitsivoq Siulersuisut siulittaasuata Michael Skourupip aamma Vagn H. Andersenip siulersuisunut ilaasortaajunnaarnissaannut.
Siulersuisunut siulittaasunngorpoq Niels Thomsen (1981-imi inunngortoq) cand. scientitut ilinniarsimasoq. allaffissornermi Ilisimatusarfimmiit. Niels Thomsen annertuumik KNI A/S-ip tunitsiviinut aamma inuiaqatigiinni nalinginnaasumik pissutsinut ilisimasaqarpoq, pingaartumik inuussutissarsiornermut.
Taassuma saniatigut Gunnar K. Gudmondsson (1959-imi inunngortoq) Ohio Universitymi aningaasarsiornermut tunngasunik ilinniarsimasoq siulersuisunut ilaasortanngorpoq. Gunnar K Gudmondsson uuliasiornermik ingerlatsivimmit annertuumik misilittagaqarpoq, tassunga ilanngullugit nunarsuarmi ikummatissanik niuernermit. Tamakku saniatigut aningaasalersuinermut tunngasunik misilittagaqarpoq soorluttaaq siulersuisuni sulinermik sivisuumik misilittagaqartoq.
Siulersiuisut siunissami ukuninnga inuttaqassapput

  • Niels Thomsen (siulittaasoq)
  • Karen Sofie Hansen-Hoeck
  • Lotte G. Lundberg
  • Marianne Wiinholt
  • Jens Kristian Therkelsen
  • Gunnar K. Gudmondsson
  • Jonas Aronsen (sulisut toqqagaat)
  • Inger Eriksen (sulisut toqqagaat)
  • H.P. Lynge-Larsen (sulisut toqqagaat)