Qimmit peqqissuunissaat

Qimmit qimuttut peqqissusaannut akisussaaqataaneq

 

Avannaani qimmeqarnissamut periarfissaqarpoq, avannaanilu qimmerpassuaqaraluartoq paarilluarneqartunik, peqqissunik nukittuunillu ilaatigut siumugassaasarput qimmiminnik ajoraluartumik paarsinerluttut. Qimmeqarfiit ilaanni qimmit pingasut perlerlutik toqusimasut pillugit nutaarsiassaq alianartoq tusareerlugu Tusagassiivimmit avannaani uumasut nakorsaat Sanne Eline Wennerberg attavigaarput, qimmit taama toqusariaqarnerannut sunarpiaq pissutaanersoq paasiniarlugu.

Sanne Eline Wennerberg:- Inuit aasaanerani feeriartillutik, sulinngiffeqarlutik, pinngortitamiluunniit angalaartillutik piniariartillutilluunniit ilaatigut qimmiminnik qanga kingullermik imertitsisimanertik nerisitsisimanertillu puigortoorsinnaasarpaat, naak ilisimagaluarlugu qimmit ulloq allortarlugu imaluunniit pingaartumik aasaanerani piffissaq sivisunerulaartoq allortarlugu nerisittartussaallugit. Aamma imaassinnaavoq angerlarsimanngiffiup nalaani qimminik paarsisussarsisoqarsimasoq, paarsisullu taassuma qimmit nerisinnissaat imertinnissaallu puigortoorsimagaa. Kisianni aamma inuttut nalaatat imaannaanngitsut aqqusaarneqarsinnaasarput, taamaalineranilu qimminik isumaginninnissaq aamma eqqugaasarpoq. Kisianni aamma ajoraluartumik naapitassaasarput inuit qimmeqarnissamut soqutiginnikkunnaartut, qimmitik allamut tunniussinnaagaluarlugit imaluunniit toquinnarsinnaagaluarlugit imminiiginnartarpaat. Uumasunik illersuineq pillugu Inatsisartut Inatsisaat nr. 25, 18.december 2003-meersumi kiisalu qimmeqarneq qitsuuteqarnerlu pillugit Inatsisartut Inatsisaanni nr.18, 30.oktober 1998-imeersumi, taassumalu kingusinnerusukkut allannguutaani allaqqavoq uumasuutillip uumasuutini pinngitsoorani ullormut ataasiarluni alakkartassagai isumagalugillu nerisillugit, imertillugit paaralugillu uumasuutit peqqissuunissamut pisariaqartitaat naapertorlugu. Nammineq isumaginissaannut periarfissaqarsimanngikkaanni inuk tatigisaq uumasuutinut isumaginnitsittariaqartoq aamma allaqqavoq.

Qimmeqarfiusuni nunaqqataasut qanoq iliussappat qimminik perlilertitsisoqarnissaa imerusutsitsisoqarnissaalu pinngitsoortinniarlugit?

Sanne Eline Wennerberg:- Qimminik kaatsitsisoqarneranik qilalertitsisoqarneranillu pasitsaassaqaraanni politiinut saaffiginnittoqarsinnaavoq. Kommunep qimmeqarnermut nakkutilliisuisa kikkut qimmeqarnersut ilisimasarpaat taamaalillutillu qimmillit attavigisinnaavaat oqarfigalugillu qimmitik neriseqqullugit imerteqqullugillu. Qimmilik nammineq nalungisarigaanni aamma pasitsaassineq ernumaginninnerlu pillugit oqaloqatiginiarneqarsinnaavoq, immaqalu arlaatigut ajornartorsiuteqarsimapput ikiuunnissamik neqeroorfigalugu. Nammineq qimmeqaraanni qimmillu kaannersut qilalernersullu nalornisigigaanni taava qimmeqarneq pillugu siunnersuutit paasissutissallu www.sulissivik.gl –ip nittartagaanut alakkarneqarsinnaapput.

Qimminik paarsinerluttoqarneranik pasitsaassaqaraanni taava kikkut saaffigineqarsinnaappat?

Sanne Eline Wennerberg:- Tassa politiit attavigineqassapput.

Namminersorlutik Oqartussat qimmeqarfinni nakkutilliisitaqarpat?

Sanne Eline Wennerberg:- Aap sapinngisarput naapertorlugu nakkutilliisoqartarpugut, kiisalu politiit kommunelu aamma suleqatigilluarlugit. Tamatuma saniatigut aamma qujanartumik innuttaasoqarpoq akisussaaqataassuseqarluarlutik saaffiginnittartunik.