"Gummistøvleparagraffi"

 

”Gummistøvleparagraffi” sunaana? Taaguut taanna oqallisaasoq Aalisarnermut Inatsimmi aalisartutut inuussutissarsiuteqalersinnaanermi piumasaqaatinut attuumassuteqartoq, Aalisarnermut Akuersissutinik Nakkutilliisoqarfimmi pisortap Mads Nedergaardip ima nassuiarpaa:

- Taaguut ”Gummistøvle-paragraffi” Aalisarnermut Inatsimmi maleruagassamut aalisartungorsinnaanermut tunngasumut taagutitut atorneqarpoq. Tassani allaqqavoq aalisartunngussaguit,  tassa aalisarnermik inuussutissarsiutilittut akuersissummik allagartaqalissaguit, taava ukiumut isertitavit affai aalisarnermit isertitarisariaqarpatit.  Piumasaqaat  tamanna eqquutikkukku aalisarnermik inuussutissarsiuteqartutut allagartaqalernissamut akuerineqarsinnaalissaatit.

Aalisartunngussagaanni isertitat affaasa aalisarnermeersuusariaqarnerannik piumasaqaat pisassiisarnerlu  imminnut sutigut attuumassuteqarpat?

Mads Nedergaard: - Aalisarnermi Inatsimmi pisinnaatitsissutinut marlunnut tunngavoq, aappaa raajarniarnermi pisassanik tunisisinnaalersitsinermik pisisinnaalersitsinermillu imaqarpoq, tassa raajarniartuugaanni raajartassat immut pisassiissutigineqarsimasut  immaqa aalisarnermik inuussutissarsiuteqartutut allagartaqaqqissaartuunngikkaluarlutik kisiannili aningaasaleerususseqartunut akissarsissutigalugit tunineqarsinnaapput. Taamalilluni raajarniutaatillit assersuutigalugu raajarniutertik pisoqalisimappat nutartertariaqalersimappallu pisassatik  piserusuttunut tunisinnaavaat nutarterinissamullu akissaqalerlutik.  Aamma imaassinnaavoq aalisartoq utoqqalilluni raajarniarunnaarusuttoq, taava pisassani allamut akilersillugit tunisinnaavai taamalillunilu aalisartuujunnaarluni.

Paragraffimiuna tassani sorpiaat atorunnaarsinneqartut?

Mads Nedergaard:- Aalisarnermut Inatsimmi paragraffit arfernanni immikkoortut ilaanni allaqqasut atorunnaarsinneqarput, tassa immikkoortut pingajuanni allaqqasut; aalisarnermik inuussutissarsiuteqarnissamut isertitat affaasa aalisarnermeersuusariaqarnerannik piumasaqaat tassani atorunnaarpoq. Tassa aalisartunngorusukkuit isertitavit affaasa aalisarnermeeqqaartariaqarnerannik piumasaqaataaruppoq.

Paragraffi pineqartoq aalisartunut ataasiakkaanut taamallaat atuuppaa?

Mads Nedergaard:- Naagga, piginneqatigiiffinnut suliffeqarfinnullu aalisarnermut aningaasaliisinnaasunut aamma atuuppoq.

Paragraffi aalisarnermik Inatsimmik allanngortitsisoq akuersissutigineqareeruni qaqugu atuutilissava?

Mads Nedergaard:- Tassa taanna oqallisaavoq, Paragraffimik allanngortitsisimaneq ukiualunni atuutereerpoq, taamaattumillu pisassanik tunisisoqareerlunilu pisisoqareernikuuvoq, taakkualu utertinneqassappata, taava tamanna pinngitsaaliissummik taarsiissutitalimmik pigisanik piginnikkunnaarsitsinertut isikkoqalersinnaammat taava aatsaat atorunnaarsitsinerup ukiut tallimat ingerlaneranni atorunnaariartuaarnissaa naatsorsuutigisariaqarparput, inuimmi aalisagartassanik pisisimasut aningaasatigut annaasaqassanngippata pisassat pisiarisimasamik nungunnissaasa tungaannut atuinissamut piffissamik pisariaqartitsinissaat naatsorsuutigisariaqarmat.

 

Aalisarneq pillugu inatsisartut inatsisaat nr. 18, 31. oktober 1996-imeersoq.

Aalisarneq pillugu Inatsisartut inatsisaata allanngortinnera pillugu Inatsisartut inatsisaat nr. 8, 22. november 2011-imeersoq.