Nakorsamut sianernermi utaqqineq akeqanngitsoq Naalakkersuisut atuutilersippaat

 

Innuttaasut nakorsiarnissamut inniminniiniarlutik oqarasuaatikkut sianerneranni utaqqinerup akeqannginnissaanik sulinerup aallartinneqarnissaa Naalakkersuisut akuersissutigeqqammerpaat. Nuna tamakkerlugu suliniutip nutaap taasuma ukiamut atuutilernissaa naatsorsuutigineqarpoq.

”Nakorsap oqarasuaataanut sianernermi akeqanngitsumik utaqqinerup atuutilersinneqarnissaa naalakkersuisooqatigiilernissamut isumaqatigiissumi oqaatigineqarpoq, anguniakkap taassuma imaaliinnartoq anguneqarsinnaalernera Naalakkersuisut nuannaarutigisorujussuuaat. Suliassaq taanna pillugu TELE-POST Peqqinnissaqarfillu suleqatigiilluarsimapput, tamannalu ikorfartueqataavoq, pilertortumik pitsaasumik iluarsiissuteqartoqarneranut”, Peqqissutsimut Attaveqarnermullu Naalakkersuisoq Steen Lynge oqarpoq nangillunilu:

”Peqqinnissaqarfiup innuttaasoq qitiutillugu sullissinissaa Naalakkersuisut pingaartippaat. Utaqqinerup akeqannginnerata atuutilersinneratigut, innuttaasut peqqinnissaqarfimmut saaffiginninnissamut assigiinnerusumik periarfissaqarnissaannut tunngatillugu qularnaarneqarnissaanut tunngatillugu ataatsimik alloriarpugut”.

Suliniummut matumunnga tunngatillugu akeqanngitsumik sianernermut atorneqartussanik peqqinnissaqarfik oqarasuaatinut nutaanik normutaassaaq. Normut tamarmik 80-imik aallaqqaatillit aaqqissuussineq atuutilersinnagu innuttaasunut nalunaarutigineqassapput.

TELE-POST-p Peqqissutsimut Attaveqarnermullu Naalakkersuisoqarfik aamma  Peqqissutsimut Pitsaaliuinermullu Aqutsisoqarfik suleqatigalugit piffissamik inniminniinermut atatillugu oqarasuaatikkut akeqanngitsumik innuttaasut  utaqqisinnaalersinniarlugit aaqqiissutissanik assigiinngitsunik toqqaapput.  Napparsimavinni peqqissaavinniluunniit tamani normu akeqanngitsumik aaqqiissutissatut toqqarneqartoq, piviusunngortitsinermi isumannaannerpaatut pisariinnerpaatullu nalilerneqarpoq.

Suliniummut nutaamut aningaasartuutit TELE-POST–imit Peqqinnissaqarfimmillu akilerneqassapput.

 

Annertunerusumik paasissutissanut Peqqissutsimut Attaveqarnermullu Naalakkersuisoq Steen Lynge, naalakkersuisumut allattaagallartoq Hanne Vibjerg aqqutigalugu  oqarasuaatikkut +299 34 66 05 imaluunniit e-mail-ikkut havi@nanoq.gl attavigineqarsinnavoq.