Isumalioqatigiissitamik pilersitsineq

Naalakkersuisooqatigiit suleqatigiinnissamik isumaqatigiissutaannut toqqaannartumik attuumassuteqartumik Naalakkersuisut 2014-mut aningaasanut inatsisissamut siunnersuuteqarnerminni saammaasseqatigiinnissamut isumalioqatigiissitamik pilersitsisoqarnissaanut aningaasanik immikkoortitsipput. Isumaqatigiissummi ilaatigut ima allassimasoqarpoq:

”Nunatta nunasiaasimanera qaangerniarlugu saammaassinissaq isumakkeerinninnissarlu pisariaqarpoq. Tamanna pillugu qanoq iliuusissamik pilersaarusiortoqassaaq.”

Aningaasanut Inatsisissatut siunnersuuteqarnerminni Naalakkersuisut anguniarpaat saammaateqatigiinnissaq siunertaralugu isumalioqatigiissitassamut attuumassuteqartumik allaffeqarfimmik pilersitsinissaq.  Saammaateqatigiinnissamut isumalioqatigiissitamik pilersitsinissaq tassanngalu kiffartuussinissaq allaffeqarfiup isumagissavaa, Naalakkersuisullu partiinik isumasiuereernerata kingorna isumalioqatigiissitap sulinerminni tunngavissaa allaffeqarfiup siunnersuusiorfigissavaa. 

Saammaasseqatigiinnissamut isumalioqatigiissitaq

Naalakkersuisut siulittaasuat, Aleqa Hammond:

- Soorunami suliassamut isummersuuteqarpunga, isumalioqatigiisitalli  nammineerluni suliassami isikkussaata aaqqissuunnissaa aamma periarfissaqarfigissavaa. Erseqqissaatigissavarali  isumaqarama  qinikkatut sulisut isumalioqatigiissitami ilaasortaassanngitsut. Saammaateqatigiinissamut isumalioqatigiisitaq politikkikkut anguniakkanik saqqummiiviussanngilaq. Akerlianilli takorloorparput inuit suliamut attuumassuteqartumik ilinniagaqarsimasut, saammaateqatigiinnissamut sulinermut ingerlatsilluarsinnaasut isumalioqatigiissitami ilaasortaatinneqassasut – tassaasinnaallutik oqaluttuarisaanermik ilinniarsimasut, tarnip pissusaannik ilinniarsimasut, qanganisarsiuut, inuup inuiaqatigiillu pissusiinik misissuisimasut, immaqaluunnit ilagiinnut sinniisussatut toqqakkat. Tamanna paasinarsiumaarpoq.

- Naatsorsuutigaara suliap naammassinerani nalunaarusiamik qanorlu iliuusissanik imalimmik tunniussisoqassasoq, taakkulu kingorna innersuussutinik malitseqarumaarput qinikkanut ingerlateqqinneqartussanik. Nunasiaataasimanerup akuerinissaanut kiisalu Kalaallit Nunaata Danmarkillu tassanilu innuttaasut saammaateqatigiinnissaannut aporfiit qanoq iliuuseqarfiginissaanut innersuussutit imaqarnissaat naatsorsuutigaara.

- Aamma nuannaarutigaara saammaateqatigiinnissamut ingerlariaqqinnissamut Kuupik Kleist tunngaviatigut akerliunngimmat. Taassuma partiillu allat oqaloqatiginissai qilanaarutigeqaakka.

Tunngaviusumik inatsisiliornissamik ataatsimiititaliaq

Naalakkersuisut Siulittaasuata Aleqa Hammondip erseqqissaatigivaa saammaateqatigiinnissamut isumalioqatigiisitap sulinera tunngaviusumik inatsisiliornissamut ataatsimiititaliassap sulinissaanut taputartuunneqassanngimmat, tunngavimmikkummi suliat taakku assigiinngimmata. Tunngaviusumik inatsisiliornissamik ataatsimiititaliami sulinermi pineqassapput Naalakkersuisunut, Inatsisartunut Eqqartuussiveqarnermullu tunngasut naleqassutsimut, aalajangersakkanut/inatsiseqarnikkut attuumassutillit– taakku akunnerminni imminnut attuumassuteqarnerat, Naalakkersuisut kommunillu attuumassuteqarnerat, innuttaasut pisinnaatitaaffii, kiffaanngissuseqarnermut pisinnaatitaaffiit, piginnittussaatitaaneq, nunanut allanut tunngassuteqartut, atugarissaarneq, Qallunaat Nunaannut attaveqarneq, naalagaaffeqatigiinneq, sillimaniarnermut illersornissamullu tunngassuteqartut, pinngortitamik atuineq, kulturikkut pingaartitat assigisaallu il.il..

- Kuupik Kleistip oqaatiga tunngaviusumik inatsisiliornissamik ataatsimiititaliamik pilersitsinissaq Inatsisartut akuereeraat. Tamanna pillugu naqqiuteqartariaqarpunga. Siuliani Inatsisartuusut taamani Naalakkersuisut suliakkerpaat nalunaarusiussasut tunngaviusumik inatsisiliornissamik ataatsimiitsitaliornissamut Inatsisartut aalajangernissaannut tunngaviliisussamik. Naalakkersuisut siuliisa suliassaq tamanna naammassisimanngilaat. Maannakkut Naalakkersuisuusut tamanna isumagissavaat, taamaasilluni ataatsimiititaliamik pilersitsinissamut aalajangernissamut tunngavissagissaarnissaq anguneqassalluni. 

- Naalakkersuisuusimasut Kuupik Kleist siuttoralugu Akileraartarnermut Atugarissaarnermullu Ataatsimiititaliarsuaq kiisalu Assartuussineq pillugu Isumalioqatigiissitat Inatsisartut apereqqaarnagit pilersippaat. Naalakkersuisut isumalioqatigiisitanik pilersitsisinnaaneq pisinnaatitaaffigigaat Kuupik Kleistip ilisimasariaqaraluarpaa. Soorunalimi, pingaartumik tunngaviusumik inatsisiliornissamik ataatsimiititaliamik pilersitsinialernermi Inatsisartut akulerutsinneqassapput taamatullu aamma saammasseqatigiinnissaq siunertaralugu isumalioqatigiisitamik pilersitsinissami partiit allat oqaloqatigeqqaarneqassapput.