Naalagaaffiit Peqatigiit Nunap Inoqqaavinut Nunarsuaq Tamakkerlugu Ullorititaat

Ullumi 9. august tassaavoq Naalagaaffiit Peqatigiit Nunarsuaq Tamakkerlugu Nunap Inoqqaavinut Ullorititaat. Ulloq nunarsuaq tamakkerlugu nalliuttorsiutigineqarpoq, ilaatigut nunap inoqqaavisa piorsarsimassusaannik, oqaasiinik kinaassusaannik nalliuttorsiutiginninnikkut ilaatigullu nunap inoqqaavisa pisinnaatitaaffiinik maluginninniarnermik pilersitsiniarneq siunertaralugu. Imminut tunngasunik aalajangiisinnaatitaaneq pillugu pisinnaatitaaffeqarneq nunap inoqqaavinit pisinnaatitaaffittut pingaarnerpaatut isigineqartarpoq. Nunarpassuarni nunap inoqqaavisa ilaasa inissisimanerat ima ajortigaaq, taakkua ilaat inuiattut nammineerlutik kinaassuseqartutut, oqaaseqartutut piorsarsimassuseqartutullu akuerineqarsimanatik.

Nunatsinni Namminersorluni Oqartussaqarnermik aaqqissuussisimaneq nunap inoqqaavisa akornanni nunarsuarmilu naalakkersuisunit amerlasuunit siuttuuffigalugu maligassatut isigineqartarpoq. Kalaallit Nunaanni Namminersorneq pillugu Inatsimmi kalaallit inuiaat inatsisaat naapertorlugit namminiilivinnissamik pisinnaatitaaffeqartutut akuerisaapput. Namminiilivinnissamik pisinnaatitaaffeqarneq pisinnaatitaaffiup atuutsinnissaanik inoqatitta innuttaaqatittalu aalajangiinerit inuiannut tunngassuteqartut nunarpullu pillugit oqaloqatigiittuarnissamik pisussaaffiliivoq.

Taassuma saniatigut nunap inoqqaavisut nunani tamalaani suleqatigiinnermut peqataassalluta pisussaaffeqarpugut aammalu nunarsuarmioqatigiinnut nunap inoqqaavisa pisinnaatitaaffiisa akuerineqarnissaannut ataqqineqarnissaannullu suleqataassalluta. Ullumikkut ullormi inuiaat kalaallit nunap inoqqaavinut ikinngutinnernerat tatiginninnerallu takutitsigu, ikioqatigiilluta iliuuseqaqatigiilluta oqaloqatigiillutalu, aamma nunarsuarmi naalakkersuisunut allanut, ataatsimoorluta nunarsuarmik pitsaanerulersitsisinnaasugut.

Naalagaaffiit Peqatigiit Nunap Inoqqaavinut Nunarsuaq Tamakkerlugu Ullorititaanni pilluaritsi.


Inussiarnersumik inuulluaqqusillunga

Aleqa Hammond, S
Naalakkersuisut Siulittaasuat