Eqqaaniut

EQQAANIUT - Isak Heilmann, 1935 - 2013


Rektor, Isak Heilmann sivisuumik napparsimareerluni 21. August 2013 toqukkut qimagussimasoq tusagassiuutitigut tusarparput.

Isak Heilmann Maniitsumi 1935-mi inunngorpoq. Meeqqat atuarfianni atuartooreerluni taamani efterskolemi Nuummiittumi 1950-imi ilinniartunngorpoq. 1952-imiit 1956-imut Nuummi Realskolemi ilinniartuuvoq. Ilinniarfissuarmi Ilinniartitsisunngorniarluni ilinniartuuvoq 1956-imiit 1959-imut. Taamani ilinniartitsisunngorniartarnermik aaqqissuussineq naapertorlugu ukioq kingulleq Danmarkimi seminariemi Isak Heilmann ilinniartuuvoq.

Ilinniartitsisumut ilinniarnini naammassigamiuk Isak Heilmann Nuummi ilinniartitsisutut sulivoq. Isak Heilmann Hjørring Seminariaani Danmarkimi ilinniartitsisutut aamma soraarummeerpoq. 1970-ikkut aallartilernerani Isak Heilmann Københavns Universitetimi eskimologiimik ilinniarpoq, taamaalillunilu Nuummi realskolemi aamma Ilinniarfissuarmi ilinniartitsisunngorluni.

11. august 1988 Isak Heilmann Qeqqani Ilinniarnertuunngorniarfimmi rektorinngorpoq, 1998-imilu juulip naanerani soraarninngornissami tungaanut rektoriuvoq aalajaatsoq sulissutaminullu ilumoortoq.

Isak Heilmann suliffimmini anguniagaqallaqqissuuvoq. Qeqqani Ilinniarnertuunngorniarfimmi sulinermini qulakkeerpaa Ilinniarnertuunngorniarfiup Ilinniarfissuarmit avissaarluni immikkut illutaqalernera. Aamma ilinniarnertuunngorniarfimmi aqutsineq erseqqissumik ilinniartunut piumaffigisaqartoq naapertuilluartorli naammassisaasa pingaarnerit ilagaat.

Isak Heilmann inuk timersullammassuusimavoq tamatigoortuullunilu. Ilinniusianik ulloq manna pingaarutilinnik suliaqarsimavoq. Immikkut taasariaqartut ilagaat Nunatta Naasui pillugit atuakkioqataanera. Ukiorpassuarni oqaatsigut pillugit suliaqarluni assigiinngitsutigut inerisaaqataavoq, aammalu atuartitsinermik inerisaanermik soqutigisaqartuunini tunngavigalugu kalaallisut atuartitsinermi inerisaajuartutut peqataajuarsimavoq.

Isak Heilmannip sulilluarneratigut ilinniartitaanikkut kulturikkullu nunarput pisuunnguallatsinneqartuartarsimavoq.

Taamaattumik eqqaaneqarnera tammartussaanngitsumik ataqqiuassavarput.

Nick Nielsen
Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq