Ilulissani qimmit pingasut toqungasut nassaarineqartut

 

Sisamanngornermi ualikkut kommunip qimmeqarnermut nakkutilliisuata, politiit uummasullu nakorsaata qimuttoqatigiit tallimaasut akornanni qimmit toqungasut pingasut nassaarineqarsimasut takuaat. Qimmit sinneruttut sulilu uummasut marluusut saloqaat kaaqqalutillu.

- Qimmit sivisuumik nerisinneqarsimannginnerat qularutissaanngilaq, taamak oqarpoq uummasunut nakorsaaneq Sanne E. Wennerberg.

Kalaallit Inuussutissalerinermut Inuussutissallu pillugit Oqartussaqarfimmeersoq (VFMG). Qimmit qimminik nakkutilliisumit nanineqarsimapput tamatumalu kingorna iliuusseqartoqarnissaa siunertaralugu uummasut nakorsaat kalerrinneqarluni.

- Qimmiutillit qimmiutimik perlerlutik toqusarnerannik 2013-imi suli akuersaartoqarmat tupinnaqaaq, uummasut nakorsaanerat  Sanne Eline Wennerberg oqarpoq.

- Aasaq manna Ilulissani qimminut tunngatillugu annertunerusumik ajornartorsiuteqarsimanngilagut – qimmiutillit amerlanerit qimmiutitik aasaq naallugu paarilluarsimavaat – taamaattoq qimmit aasaanerani nerlersorneqarlutillu imissaqartinneqartuarnissaat isiginiartuartariaqarpagut – pissutsit pitsanngoriartortorujussuupput – taamaattumik taamatut ittunik takusaqarneq ajoraluaqaaq.

Qimmit marluk suli uummasut toqunneqarput, ajoqutissarilikkaminnik sanigorsimaqimmata. VFMG-ip qimmiutillit kaammattorpai ikioqatigiittaqqullugit qimmit imissaqarlutillu naammattumik nerisinneqartarnissaat eqqarsaatigalugu.

- Qimmiuteqarnissat piffissaqarfiginngikkukku kissaatiginngikkukkuluunniit qimmitit allanut tunniutikkit toqotsillugilluunniit – perlerlutik toqusarnerat akuerineqarsinnaanngilluinnarmat, uummasut nakorsaanerat Sanne Eline Wennerberg naggasiilluni oqarpoq.

 

 

Qimmit nerlersorneqartarneranut paarineqartarneranullu tunngatillugu siunnersuinissaminut ilitsersuinissaminullu VMFG piareersimavoq. Tamatuma saniatigut qimmit pillugit paasissutissat uani takuneqarsinnaapput www.sullissivik.gl