Kujataani ataatsimiisitsinernit

Kujataata illoqarfiini nunaqarfiinilu atugarissaarneq ineriartortitsinerlu oqaluuserineqartut

Kujataani Naalakkersuisut angalanerat innuttaasunik oqaloqatiginninnissamut periarfissiilluarsimavoq. Nunap ilaani illoqarfiit nunaqarfiillu ataatsimoorussanik unammillerfissaqarlutillu assigiinngitsupilussuarnik ilippanaateqarfiupput. Taamaattorli sumiiffinnut tikeraarfigisanut tamanut innuttaasut takkuttut ataatsimoorullugu atugarissaarneq aamma ineriartortitsinissamut piumassuseqarneq assut sammisarisimavaat.

Inunnik isumaginnittoqarfik oqallinnermi sammineqarluaqqippoq. Ingammik ilaqutariinnut atugarisat peqqissaarullugu oqallisigineqarpoq. Ilaqutariinnik isumassuinissamut periarfissarpiaq Naalakkersuisut annertuumik pingaartissimagaat, aammalu innuttaasunut ikiorserneqarlunilu siunnersorneqarnissamut oqinnerulersillugu aaqqissuussiviusup ineriartorteqqinnissaanut aningaasanik immikkoortitsisimasut Martha Lund Olsenip naqissuserpai. Psykologinik angalasartoqarnissaq pillugu nutaarsiassaq tiguneqarluarpoq.

Aammattaaq Nanortalimmik plejehjemmit iluarsaannissaanut Naalakkersuisut 2014-imut Aningaasanut Inatsisissatut siunnersuummi aningaasaliinissaq pingaartissimagaat Martha Lund Olsenip ilisimatitsissutigisinnaavaa.

Inuussutissarsiornikkut ineriartortitsinermut tunngatillugu nunap ilaani innuttaasunik inuussutissarsiorfiusumillu ataatsimiinnernit nalunaarut pingaarnerpaaq tassaavoq angallannermi atugarisanik piaartumik paasisaqartoqarnissaa.

- Jens-Erik Kirkegaardip ataatsimiinnernit assigiinngitsunit oqariartuut eqikkarpaa: Qaqortumi nunap ilaanik nunap sinneranik attaviliisussamik mittarfiliortoqarnissaq pisariaqartinneqarpoq. Mittarfiup aamma takornariat Islandikkoortut pitsaanerusumik attavilernissaat isumannaassavai. Tamanna ilutigalugu mittarfeqarfiup akitsuuteqartitsisarnermut aaqqissuussinera takornariaqarnermi ineriartortitseqqinnissamut aporfissaliinersoq misissussavarput.

Angalanermit nuannaarutaasutut pissarsiarisaq alla tassaasimavoq nerisassalerisoqarfimmi ineriartortitsinermik Kujataani qanoq samminnittoqartuunerata takuneqarnera. Kujataani nerisassiornermik festivaleqartitsinermi ”Igasa”-mi peqataanissamut soqutiginninneq, aammattaarlu inuussutissarsiutitigut suliniutivinnik ineriartortitsinissanut periarfissanut isumassarsiassaqarnermik annertuumik peqarnermut takussutissaapput.

Ilaatigut nerisassialerinerup takornariartitsinerullu iluini najugaqarfinni inuussutissarsiornermi suliat ineriartortinnerinik tapersersuinissaq Naalakkersuisut siunertaqartuusut Jens-Erik Kirkegaardip ilisimatitsissutigaa. Taamaattumik najugaqarfinni inuussutissarsiornermi pilersitanut pitsaasorpassuarnut tapersersuinissamut agguaassassat 15 mio. kr.-t missaat immikkoortinneqarsimapput.

Nanortalimmi Qaqortumilu innuttaasut akornanni ingammik sulianik ilinniarfinni ilinniagaqarsinnaanermut inuusuttut periarfissarisaat assut sammineqarput. Ilaatigut suliffinni sungiusarfissat aamma ilinniagaqarnermut atasumik angalanermut aningaasartuutit pillugit unammillerfissat pineqarput.

Inuussutissarsiutinik ilinniagaqarnernik ineriartortitsiuarnissaminnik Naalakkersuisut sammisaqarnerat Nick Nielsenip naqissuserpaa, taamaalilluni nunatsinni isorartoqisumi unammillerfissat immikkut ittut isumaginiarneqarlutik.

Aammattaaq Nanortalimmi unnukkut ataatsimiisitsinermi Kalaallit Nunaata oqaluffii taakkununngalu tunngasut oqaluuserineqarput. Ilaatigut nunami oqaluffiit kusanartorpassuit iliveqarfiillu iluarsaallugillu aserfallatsaaliornissaat sammineqarput. Ilagiinnut tunngasunik aamma oqaluuserisaqarsinnaaneq Nick Nielsenip nuannaarutigaa, ilagiinnilu innuttaasut suliaqartut meeqqat inuusuttullu ilanngutsinniarnissaannik kaammattuuteqarluni.

Angalaarneq savaatillit nunaqarfiini Igalikumi Qassiarsummilu tikeraarnernik naggaserneqarput.