Issittumi Siunnersuisooqatigiit

Issuttumi Siunnersuisoqatigiinnut Kalaallit Nunaat peqataaleqqippoq

Canadamik isumaqatigiissuteqarnikkut Issittumi Siunnersuisoqatigiinni Kalaallit Nunaata suleqataanera aallarteqqippoq. Isumaqatigiissuteqarnikkut suleqatigiinnissamut toqqaannartumik Kalaallit Nunaata peqataanissaa nukittorsarneqarpoq.

Naalakkersuisut Siulittaasuata Aleqa Hammondip Nunanut Allanut Sillimaniarnermullu Ataatsimiititaliaq ullumikkut ilisimatippaa Kalaallit Nunaata Issittumi Siunnersuisoqatigiinni peqataaleqqinnissaanut aqqutissiuussisumik siulittaasoqarfik Canadamit maanna tigummineqartoq siunnersuuteqartoq.

Naalakkersuisut siulittaasuat Aleqa Hammond:

- Siulittaasoqarfik Canadamit maanna tigummineqartoq peqatigalugu angusaq assut nuannaarutigivara. Issittumi suleqatigiinnermi Kalaallit Nunaata peqataanissaanut periarfissat annertuumik nukittorsarneqarput, taamaasilluni Issittumi Siunnersuisooqatigiit ataatsimiinnerini tamani Kalaallit Nunaata siunissami peqataasarnissaa qulakkeerneqaqqilluni.

- Issittumi Siunnersuisooqatigiinni Kalaallit Nunaata peqataasarnerata unitsikkallarnissaanik aalajangernitta kingorna isumaqatiginninniarnerit aallartinneqarmatali danskit Nunanut Allanut Ministeriat Savalimmiormiullu lagmandiat qanimut attavigisarsimavakka.

- Suli sulissutigiuassavara periarfissaqartilluta Kalaallit Nunaata nammineerluni isumaqatiginninniarsinnaajuaannarnissaa. Pingaaruteqarpoq nunanik tamalaanik suleqateqartilluta Kalaallit Nunaata ersarissumik peqataasarnissaa.

Isumaqatigiissuteqarnerup inissat naammattut qulakkeerpai

Periuseq maanna atuuttoq malillugu Issittumi Siunnersuisooqatigiinnut atasumik ataatsimiittoqartillugu Canadamiullu siulittaasuuffimmik tigummiaqartillugit inissanik naammattunik Naalagaaffeqatigiit tigummiaqartussaavoq. Taamaasilluni Kalaallit Nunaat ataatsimiinnerni peqataaleqqissinnaalerpoq.

Isumaqatiginninniarluni ataatsimiinnerni allartitanut inissat pingasunik ikinneruppata Naalagaaffeqatigiinnerup iluani aallartitat suliassanik agguataarinnerannut apeqqutaasassaaq sammisamut atatillugu oqartussaaffiup suunera. Taamaasilluni 2009-mi Namminersulerneq eqqumaffigineqarpoq, tassungalu ilaavoq suliassaqarfinnut ataasiakkaanut tunngatillugu Kalaallit Nunaata tigusiartuaarnera. Isumaqatigiissuteqarnikkut taamaasilluni suleqatigiinnissamut toqqaannartumik Kalaallit Nunaata peqataanissaa nukittorsarneqarpoq.

Issittumi Siunnersuisooqatigiit pillugit

Issittumi Siunnersuisooqatigiit tassaapput nunat tamalaat akornanni qaffasissumik inissisimasut suleqatigiiffiat nunat issittumiittut arfineq pingasut ilaasortaaffigisaat – ilaasortaapput Canada, Kunngeqarfik Danmark, Finland, Island, Norge, Rusland, Sverige aamma USA. Suleqatigiiffiup qulakkeerpaa nunat issittumiittut nunap inoqqaavinik peqataatitaqartitsisut suleqatigiinnissaat aammalu misilittagaasa ataqatigiissaarnissaat paarlaateqatigiittarnissaallu.

Issittumi Siunnersuisooqatigiit ataanni suleqatigiissitat arfiniliupput. Suleqatigiissitani Kalaallit Nunaata peqataaffigisaani soqutiginaateqarnerpaat tassaapput SDWG (Sustainable Development Working Group) CAFF-ilu tassani naalagaaffeqatigiit sinnerlugit allartitat Namminersorlutik Oqartussat siuttuuffigalugit.

Issittumi Siunnersuisooqatigiit pingaarnertut sammisarivaa Issittumi avatangiisit, tassunga ilaallutik naasut uumasullu, nungusaataanngitsumik ineriartortinneqarnissaannut illersorneqarnissaannullu tunngasut apeqqutit.

Issittumi Siunnersuisooqatigiit tassaavoq – nunani issittumi suleqatigiiffiit pingaarnersaat pingaarneruleriartuinnartussarlu. 1996-mi Issittumi Siunnersuisooqatigiit pilersinneqarnerminiit ilisarnaatigivaa issittumi inuit immikkut samminerat akuutinneqarallu.

Annerusumik attaveqarniaraanni:
Naalakkersuisut siulittaasuat Aleqa Hammond, una aqqutigalugu: tusagassiuutit pillugit ataqatigiissaarisuugallartoq Julie Rademacher, mobil +299 54 8878