Aleqa Hammond naalagaaffeqatigiinneq pillugu Danmarkimut ataatsimiigiarpoq

Naalakkersuisut Siulittaasuat Aleqa Hammond naalagaaffeqatigiinneq pillugu Danmarkimut ataatsimiigiarpoq

Statsminister Helle Thorning-Schmidt, Savalimmiuni Lagmand Kaj Leo Holm Johannesen aamma Naalakkersuisut Siulittaasuat Aleqa Hammond ukiumoortumik aggustip 29-ani naalagaaffeqatigiinneq pillugu Danmarkimi ataatsimiissapput.

Naalakkersuisut Siulittaasuata, Statsministerip Lagmandillu naalagaaffeqatigiinnermi apeqqutit assigiinngitsut oqaloqatigiissutigissavaat.

Naalagaaffeqatigiinneq pillugu ataatsimiinnerit persuarsiortumik aammali persuarsiunngitsumik ingerlanneqartarput. Naalagaaffiup siuttuisa aappaat ataatsimiinnerni taakkunani aamma qaaqqusaasarput, qaaqqusisuusorlu aamma paasisassarsiortitsilluni angalatitsisarpoq. Paasisassarsiorluni tikeraagassat tassaassapput Møn, Vordingborg kiisalu Statsministerip aasarsiortarfia Bogømiittoq.

Siorna 2012-imi naalagaaffiit Kalaallit Nunaanni ataatsimiipput.
Aleqa Hammond ima oqaaseqarpoq:

”Naalagaaffeqatigiinnerup iluani qilerutitta nukittuut uppernarsaqqinnissaat qilanaareqaara.

Issittumi Siunnersuisoqatigiinni Kunngeqarfiup peqataanera pillugu Danmarkip, Kalaallit Nunaata Savalimmiullu suleqatigiilluarnerat eqqarsaatigalugu Issittumi Siunnersuisoqatigiit naalagaaffeqatigiinneq pillugu ataatsimiinnermi aamma qaqitassama ilagaat.

Kalaallit Nunaata Issittumi suleqatigiinnermi nukittunerusumik inissinnera, sapaatip akunnerata siuliani anguneqartoq pisinnaasimassanngikkaluarpoq nunat taakku pingasut suleqatigiilluarsimanngikkaluarpata.

Aammattaaq pingaarpoq naalagaaffeqatigiinneq pillugu oqaluuserissallugu suliassaqarfinnilu allani tamanut pitsaasumik ineriartortoqarnissaa pillugu aamma oqaloqatigiissutigiuartariaqarparput.

Pisarneq malillugu Naalagaaffeqatigiinneq pillugu ataatsimiinneq tusagassiortunik katersortitsinermik naggaserneqassaaq. Tamanna pissaaq Arkenimi Ishøjimiittumi aggustip 29-ani nal. 11.45.