Qulimiguulinnik nutaanik pisinissamik aalajangiinissamut pingaarutilimmut SAS mattussivoq

Air Greenlandip qulimiguulinnik EC155-inik atornikunik pingasunik – katillugit kr. 105,1 mio.-inik aningaasaliinermi – pisinikkut ingerlatseqatigiiffiup Bell 212-iutai pisoqalilersut taarserniarlugit aallartinnissaanut Air Greenlandip aqutsisuisa pisinermut isumaqatigiissuteqarnissamik piginnaatinneqarnissaat pillugu inassuteqaat Air Greenlandip ullumi immikkut ittumik ataatsimeersuarnermini oqaluuseraa. Aktiaatillit isumaqatigiissutaat naapertorlugu taama aalajangiiniarnermi aktiaatillit ataatsimeersuarnermi peqataasut aningaasaatinik annikinnerpaamik 80 %-imik piginneqataassuteqartut akuersissuteqarnissaat piumasaqaataavoq. Tassa imaappoq, piginneqataasut pingasuusut tamarmik isumaqatigiittariaqarput. Inassuteqaatip taperserneqarnissaanut piginneqataasut pingasuusut akornanni isumaqatigiittoqanngilaq, taamaattumillu tamanna itigartinneqarluni.

Tamatumani pineqarpoq qulimiguulinnik nutaanik pisinissaq pillugu aalajangernissamut SAS isumaqataanngimmat aammalu Naalakkersuisut Siulittaasuat Aleqa Hammond tassunga atatillugu oqarluni ilaatigut Kujataani Qeqertarsuullu Tunuani ilaasunik angallassinermi pitsaanerusumik sullissinissap qulakkeerneqarnissaa pillugu aalajangiinissami taama pingaaruteqartigisumi SAS maanna mattussimmat ajuusaarnartoq.

SAS-ip Air Greenlandimi aktiaatimi tunineqarnissaat kissaatigaa aammalu Namminersorlutik Oqartussanut neqeroorfigalugit. Namminersorlutik Oqartussat soqutiginnipput isumaqarlutilli SAS-ip aktianut akigitinniagai qaffasippallaartut – pisisussanillu allanik soqutiginnittoqarnani. Tassunga atatillugu Naalakkersuisut Siulittaasuat Aleqa Hammond oqaaseqarpoq, pisinermi akiusumik qaffasippallaamik SAS-ip Namminersorlutik Oqartussat akiliisinniarsarimmagit kusananngitsumik iliornerusoq. SAS-i piginnittuujumajunnaarnerani ikiorusupparput pinngitsaalineqarlutali isumaqatigiinniarnissarput kissaatiginngilarput – tamanna kialluunniit akuerisinnaanngilaa, pingaartumillu Nunatsinni innuttaasut akuerisinnaanagu. Maanna danskit naalakkersuisuinut SAS-imik piginneqataasunut saaffiginnissaagut, SAS-ip Air Greenlandimik siunissami piginneqataanissaa pillugu pitsaasumik oqaloqatigiinnissaq qulakkeerniarlugu, taamaalilluta Nunatsinni ilaasunik angallassinermi sapinngisamik pitsaanerpaamik sullissinissaq qulakkeerniarlutigu, taama Hammond naggasiivoq.