Isumaginninnermut ilinniarfiit kattunniarneqarnerat

Ilisimatusarfimmi rektori Tine Pars, apersorneqarnermini ernumalluni oqariartuuteqarsimavoq isumaginninnikkut ilinniakkat Ilulissani katersuunneqaraluarpata, ilisimasat assigiinngitsut annaaneqarsinnaanissaasa kingunerisaanik pisoqariaannaassasoq, tassami ilisimatusarnikkut suliniutaasinnaasut ingerlakkuminaannerulersinnaassammata. Tamanna tunngavigalugu Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen erseqqissaateqarpoq, isumaginninnikkut ilinniartitaanerni anguniakkat qaffasissumik inissisimasuummata, imatullu oqaaseqarluni:

”Periarfissaq iluatsillugu erseqqissaassutigissavara, isumaginninnikkut ilinniartitaanerit siunissami sumiiffissaat ilusilersorneqarnissaallu suli aalajangerneqanngimmat. Kanukuka isumaginninnikkut ilinniarfinnut nukittorsaaneq siunertaralugu soqutiginartumik saqqummiussisoraara, tamatumani aamma isumaginninnikkut innuttaasut kiffartuunneqarnissaat pillugu. Kanukokap siunnersuuteqarnermini aallaavigivaa isumaginninnikkut ilinniarfiit nukittorsarneqarnissaannik kissaateqarneq, atuagarsornikkut ataatsimoorfeqarnermik tunngavilik, tamannalu Ilulissani inissisimanissaa siunnersuutigalugu.Uanga aamma soqutigisaraara isumaginninnikkut suliffeqartut sutigut tamatigut suliaminnut piginnaassaqarnerulernissaat, taamaattumillu isumaqarlunga, kommunit isummersornerat aamma ajunngitsumik tiguneqartariaqartoq. Oqareernertuut soqutigisaqartut assigiinngitsut peqatigalugit siunissamut aaqqiinissamut nalilersuinerit ingerlatissamaarpakka, tamatumani soorunalimi aamma Ilisimatusarfik ilanngullugu. Kisianni manna erseqqissaatigissallugu, Naalakkersuisut ilinniartitaanikkut nukittorsaanissaq siunertaralugu pilersaarutigisaat aallaavigalugit oqallinnerup ingerlanneqarnissaat kissaatigigakku, tamatumani aamma ilinniartitaanerit siammasissumik inissinneqarnissaat eqqarsaatigalugu”.

Ilanngullugu Nick Nielsen-ip erseqqissaassutigivaa, ilisimatusarnikkut suliniutit aamma isumaginninnikkut ilinniartitaanerni ilagilluinnartariaqarmassuk:

”Soqutigisaqartut assigiinngitsut peqatigalugit isumaginninnikkut siunissamut pilersaarutit ineriartortitsinissallu eqqartuiffigerusoqaakka. Tamatumani aaqqiissutaasinnaasut arlaqassasut qularutiginngilara aamma isumaginninnermi ilisimatusarnikkut akuujuarnissaat eqqarsaatigalugu. Taamaattumik soqutigisaqartunik oqaloqateqarnissara qilanaareqaara. Periarfissat aamma ilagivaat, SPS-p Ilisimatusarfiullu ataatsimoortillugit kattunneqarsinnaanerat, immikkut ilisimasalittut batchelor-itut ilinniartitsisinnaanissat eqqarsaatigalugit. Kisiannili oqaatigisariaqarpara, uanga nammineerlunga qularutiginnginnakku ilinniartitaanerit ilisimatuussutsikkut ingerlatsivissatut aaqqiivigineqarsinnaammata, aamma Nuup avataani inissisimagaluarunilluunniit. Nunatta soqutigisai aallaavigalugit ilisimatusarnerit, soorunalimi nunatsinni sumiluunniit ingerlanneqarsinnaasariaqarput.”

Paasisaqarnerorusukkaanni attavigineqarsinnaavoq naalakkersuisumut allatsi Bent Møller, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfik; oqarasuaat: +299 54 84 59.