Isumaginninnermi ilinniarfinnik kattussuineq

Kanukokap siulittaasua, Martha Abelsen, juulip aqqarngani tusagassiortunut nalunaarummini siunnersuutigaa perorsaasunngorniat isumaginninnermullu siunnersortitut ilinniarfiit, Ilulissani katersuullugit aaqqinneqartariaqartut.

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisup Kanukoka soqutigisaqarfiillu allat peqatigalugit oqaloqatigeeqqinnissamut siunnersuut tunngavissatut isigaa imatullu oqaaseqarfigalugu.

“Sineriap sinneranut annertusiartortumik siammartiteriniarluta suliniarnitsinni, uannut pingaruteqarpoq kommunit peqataatinneqarnissaat. Pitsaassutsimillu qaffasissumik qulakkeerinninnissamik periarfissarsiunitta aammalumi isumaginninnerup perorsaanermilu ilinniartitaanermi amerliartortunik ilinniartoqalernissaa uannut qitiulluinnarpoq. Taamaattumik uangaalluni nuannerpoq taamatut ilinniartitaanermi Ilulissani katersuinissamik siunnersuut. Nammineerlunga Naalakkersuisunullu sinerissamut siammartiterinissamut eqqarsaatersuuteqarnitsinnut naapertuuppoq, taamaattumillu qularineqassanngilaq aalajangiusimannikkama Kanukoka suliffeqarfiillu pineqartut peqatigalugit siunnersuut pillugu oqaloqatigiinnerit ingerlariaqqissasut.”

Naalakkersuisoq Nick Nielsen-ip erseqqissaatigaa, katersuinerup periarfissiinerata qaavatigut aamma takusinnaagamiuk ungasissumit ilinniartitsinnaanermi periarfissaginnerulersitsinnaanera.

“Soorunami ilinniartitaanerup, tunngaveqarluarnissaa siunertaralugu, Ilulissani illutalerlugit sinaakkusersornissaata qulakkeerneqartariaqarnerata saniatigut, ungasissumit ilinniarsinnaanerup nutaamik periarfissiinerata atorluarneqarnissaa uannut pingaaruteqarluinnarpoq.Isumaginninnerup iluani tunniusimalluartunik sulisoqarpoq ilinniariaqqinnissamut periarfissanik iluarisimaarinnittussanik, kisiannili sivisuumik peqannginnissamut kommunip sulisitsisutut ilaquttallu pisariaqartitsisut qimassinnaasarnagit, illoqarfimmi allami ilinniaqqinnissaq pisussaatillugu.Upperaaralu nunarput tamakkerlugu piginnaanngorsaqqinnerit, sulerusussuseqalersitsinerit kiffartuussilluarnerulernerillu qularnaarsinnaagingut amerlanerujuit isumaginninnermi piginnaanngorsaqqillugit ineriartortitsinitsigut. Tamannalu taamaallaat ungasissumik ilinniartitsinikkut pisinnaappat, taava siunissatta tamanna ilagisariaqarpaa” oqaaseqarpoq Nick Nielsen nangillunilu “Upperaara aamma ilinniartitseriaatsit katersorneratigut, aamma pitsaanerusumik tunngavilissasoq tamakkiisumik ilaannakortumilluunniit ungasissumik ilinniartitseriaatsinik ineriartortitsinermi.”

Inussiarnersumik inuulluaqqusillunga

Nick Nielsen, Naalakkersuisoq