Naalakkersuisoq Nick Nielsen kollegianik amigaateqarneq pillugu

Nick N 040613

Nuummi kollegiassaaleqineq pillugu tusagassiuutitigut malinnaavigineqarneranut Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq imatut oqaaseqaateqarpoq:
“Maluginiarsimavara nunatsinni piffinni arlalinni ilinniartut inissaanik pisariaqartitsisoqarnera. Ajornartorsiut pineqartoq Nuummiinnaq ajornartorsiutaanngilaq, illoqarfinnili aamma allani ilinnigaqarfiusuni ajornartorsiutaalluni. Taamaattumik Naalakkersuisut kollegiassanik sanaartornissaq pingaartillugu suliniuteqarfigilersimavaat, Nuummiinnaanngitsoq, kisianni piffinni arlalinni pilersaarusiorsimallutik” .
Nick Nielsen-ip ilanngullugu erseqqissaatigivaa, kollegianik amigaateqarneq aaqqiiffiginiarneqarmat.

“Nuummi piffinnilumi arlalinni sulissutigaarput qulakkeerniarlugu, assigiinngitsutigut qanoq iliuuseqarnitsigut kollegiassaaleqinerup aaqqiiviginiarnissaa. Pisarnertut piffissami qaninnermi ilinniarfiit aallartikaaqqilerpata kollegianik amigaateqarnerput malunniuttussaassooq. Taamaattumik najugaqarfiit arlaqartut attartorallarnikkut pissarsiariniarsaraagut. Tamatumani aamma pisortat illuutaat inoqanngitsut ujartuiffigisatsinnut ilaapput, namminersortullu aamma illuutigisaat ujartuiffigineqarlutik. Neriuutingaaralu ilinniagaqartut tamaasa inissaannik neqeroorfigisinnaajumaarlugit. Taamatut oqarnikkut pingaaruteqarluinnartutut isigivarput ilinniagaqartut tamakkerlugit kollegiani inissaqartinneqarsinnaanissaat ilinniarfissaminnilu aallartissinnaanissaat. Ilaqutariit piffissami sivikitsumi periarfissamik allamik iliuuseqarallartarsinnaapput, soorlu aapparisap najugaqarfimminiikkallaannarneratigut, qaammatialuillu qaangiuppata inissaqalerunik malinnaallutik. Tassami kingusinnerulaartukkut inissat pissarsiariniassallugit ajornannginnerulertartut misilittagaqarfigigatsigu.”

Naggataatigut Nick Nielsen-ip erseqqissarpaa, ilinniagaqartut nammineerlutik akisussaassuseqarmata ilinniakkaminnik ingerlatsinissaminnik.

“Ilinniartitaanerup pilersaarusiorneqarnerani kollegiassanik amerlasuunik sanaartortoqarnissaa pilersaarutigineqarpoq. Tamanna ukiuni aggersuni naammassiniarneqartussaavoq. Ilinniagaqarniarlutik aallartittussarpassuit amerlaqaat, aamma ukiut arfineq marluk matuma siornamut sanilliullugu. Tamannalu nuannaarutissaavoq. Ilanngulluguli eqqaasitsissutigerusuppara, nunatsinni pissutsit qimerluuataaraanni imaammata, nunanut allanut sanilliulluta kollegiarpassuarnik peqareeratta. Taakkunannga amerlasuut meerartalinnut naatsorsuussaallutillu kisermaanut meeralinnut sananeqarsimapput.

Kikkulluunniit ilinniarusullutik aallartitserusuttut tapersersorpagut, tamatumani apeqqutaatinnagu ilaqutariissuttitigut qanoq inissisimasuunersut. Aamma ilaqutartaareersimagaluarlutik ilinniarniarlutik aalajangersimasut tapersersorusuppagut, tamatumuunami unammillernartumik aallartitsiniartut nuannaarutigisariaqaratsigit. Taamaattorli pissutsit tamakku aamma kollegiassaaleqinitsinnut annertusaaqataapput, aamma ilaqutariinnut kollegiat angissutsimikkut assigiinngitsut eqqarsaatigalugit, amerlasuut ilinnialertigatik naammassitinnatilluunniit ilaqutartaareersimasarmata.”

Paasisaqarnerorusukkaanni attavigineqarsinnaavoq naalakkersuisumut allatsi Bent Møller, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfik; oqarasuaat: 34 50 00.