Nuna tamakkerlugu kollegianut innersuussisarneq assigiippoq

Kommuneqarfik Sermersooq-mi borgmester Asii Chemnitz Narup oqaaseqarnermini eqqaavaa, Namminersorlutik Oqartussat ilinniagaqartut Nuumminngaaneersut immikkoortillugit pissuseqarfigigai, tamatumani sinerissamiit aggersuniit kollegianut innersuussisarnermi Nuumminngaaneersut ajornerusumik pineqartarnerarlugit.

Tamatumunnga tunngatillugu Ilinniartitaanermut, Ilageeqarnermut, Kultureqarnermut, Naligiissitaanermullu Naalakkersuisup pisariaqartippaa erseqqissaassutigissallugu, ilumut Nuumminngaaneersut taamatullu illoqarfinni allaninngaanneersut akornanni assigiinngisitsisoqannginnerarlugu, nangillunilu:

”Kollegiat pillugit peqqussummi nassuiarneqarsimapput illoqarfimmi ilinniarfigisamiit avataaneersut kollegianut innersuussisarnerni salliutinneqartussaasut. Tamannali illoqarfinni ilinniarfeqarfiusuni tamani atuuppoq. Assersuutigalugu Ilulissaneersut kissaatigisimagunikku Ilulissani ilinniagaqarniarlutik, taava Ilulissani kollegianut innersuussisarnerni taakkua kingullerpaatillugit innersuuneqartarlutik. Imatut isumaqarpoq Qaqortormioq nunagisamini ilinniagaqarniarluni siunniussaqarsimaguni, taava aamma taanna Qaqortumi kollegianut innersuussisarnermi tunulliussaassaaq. Tamanna illoqarfinni tamani taamatut atuuppoq, aamma Nuuk ilanngullugu. Ilinniariartortut illoqarfiup ilinniarfeqarfiusup avataaneersut kollegianut innersuunneqareerpata, suli kollegiani inissaqartoqarsimassappat, taava illoqarfimmi tassanngaanneersut innersuuneqarsinnaapput. Tamatumanili toqqammavigineqartarput kollegiat pillugit peqqussummi tulleriiaarinnittarnerni maleruagassatut aalajangersaavigineqarsimasut.

Taamatut tulleriiaarisoqartarneranut soorunalimi patsisigineqarpoq kollegianut innersuussisinnaaneq illoqarfiup pineqartut avataaneersut tassani ilinniagaqalersinnaanissaanut aalajangiisuulluinnartarmat. Akerlianik ilinniagaqartut illoqarfimmi ilinniarfiusussaminngaanneersut amerlanertigut ilinnialersinnaasarput kollegiani inissaminnik innersuussiffigineqanngikkaluarlutik. Kollegiat pillugit peqqussutitigut aamma qulakkeerneqarsimavoq kollegiatigut periarfissagut killiffissaat naapertorlugit innersuussisarnerit aaqqiivigisariaqartassagivut, tamatumuunali qulakkeerniaqqaartariaqaripput sinerissamit suminngaanneersut ilinniarusutaminni ilinniartunngortarsinnaasarnissaat. Tamatumani aamma Nuumminngaaneersunut atuuppoq, ilinniarfigerusutartik Nuup avataanni inissisimasuusimassappat. Taamaattumik aamma uanga utertitsissutigisariaqarpara, ilumoormat Nuumminngaaneersut sinerissamit allaneersunit sanilliullugit ajornerusumik pineqarneq ajormata.

Eqqartorneqarput tunngavissaqarluarluni tulleriiaarinermut aalajangersakkat, tamannali eqqarsarluaraani apeqquserneqarsinnaanngilaq. Aamma taamatut tulleriiaarinnittarneq innuttaasut naligiimmik pineqarnissaat siunertaralugu isummanut akerliunngilaq.

Ilanngullugu Nick Nielsen-ip erseqqissaassutigivaa, kollegianik sanaartortitsiuarnissaq pingaartinneqartuartoq:

”Soorlu qasseeeriarlugu oqaatsigisareersimagiga, Naalakkersuisut isaanniit isigalugu kollegianik sanaartortitsiuarnissaq pingaarnerpaatitatsinnut ilaajuarallassaaq. Aamma qasseeriarlunga oqariartuutigisarsimavara tamatumani Nuuk kisimi pineqanngimmat. Naggataatigut erseqqissaassutigerusuppara, kommunit tamarmik periarfissaqarmata illoqarfigisaminni kollegianik sanaartortitsinissaminnut. Kommunit taamatut kissaateqarsimassappata aamma uanga tamakku oqaloqatiginissaanut piareersimajumaarpunga. Aamma kollegiat pillugit peqqussutip nalilersoqqinneqarnissaanut tunngatillugu piareersimavunga kommunit apeqqut pillugu oqaloqatiginissaanut.”


Attavigineqarsinnaavoq: Bent Møller 548459