Ujarassiorit 2013 – Ujarlerneq aallartippoq

Ujarassiorit – nuna tamakkerlugu ujarassiornermik soqutigisalinnut unammisitsineq – ukiormanna aallarteriivippoq. Ujarassiorit ukiuni 25-ni maannakkut ingerlanneqareerpoq.

Akissarsiassat akileraarutitaqanngitsut katillutik 120.000 kroneupput, taakkunanngalu ajugaasup 55.000 kr. pissarsiassarai.

Ujarassiorit Inuussutissarsiornermut Aatsitassaqarnermut Suliffeqarnermullu Naalakkersuisoqarfimmit ingerlanneqarpoq aningaasalersorneqarlunilu. Eqquisut suliffeqarfinnit aningaasaateqarfinnillu ukunannga akissarsitinneqassapput:

Aningaasaliisut GrønlandsBankip Inuussutissarsiutinut Aningaasaateqarfia aamma Greenland Minerals and Energy A/S tamarmik immikkut 40.000 koruuninik akissarsiassanut ataatsimoortunut tunniussipput.

NunaMinerals A/S akissarsiassanut ataatsimoortunut katillugit 10.000 kr.-inik tunissuteqarput.

Internetikkut nittartakkami www.ujarassiorit.gl–imi Ujarasiornermi paasissutissanik pissarsisoqarsinnavoq. Tassani ilaatigut aamma quppersakkat saqqummersitallu allat ujarassiornermi iluaqutaasinnaasut aaneqarsinnaapput assersuutigalugu atuagaq ”Mineral-guide – Prospektering for amatører”, taanna aamma juulip qaammataani allakkerivinni tamani akeqanngitsumik agguaanneqartussaavoq.

 

Unamminermi peqataasut nassiussilernermi atugassaat aamma immersugassaat, soorlu ateq, najukkap il.il. nalunaarsorneqarfissaat allakkerivinni pisinnaavaat. Nunap assinganilu nassaarfiup nalunaaqutserneqarfissaa aamma ilaavoq nassiussinerlu akeqanngilaq.

Ukiormanna Ujarassiorimmut peqataasut nassaavi Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmit 1. oktober 2013 nallertinnagu tiguneqareersimassapput. Nassaat 1. oktober 2013-ip kingorna tiguneqartut ukiup tulliani ujarassiorimmi ilaatinneqassapput.

Inuussutissarsiutiginagu ujarassiortut Kalaallit Nunaanni inuit allattorsimaffianni nalunaarsorsimasut kisimik peqataasinnaapput. Ujaqqat nunatsinneersut kisimik nassiunneqarsinnaapput aamma ujaqqat nassaariffii sukumiisumik aatsaat nalunaarutigineqarpata peqataasut akissarsitinneqarsinnaapput. Karseeqqami ataatsimi nassiunneqartumi taamaallaat ujarak ataaseq nassiunneqassaaq, anginerpaamillu assammit eqeruloorsimasumit anginerussanngilaq, qaarsumiillu ujarak sapinngisamik peerneqarsimassalluni.  Ujaqqat

nassiussat utertinneqarsinnaanngillat.

 

Ujarassiorluarisi!

 

Ujarassiorit ujarassiornerlu pillugit paasissutissanik perusukkaanni seniorgeologi Anne Clausen attavigineqassaaq.

Annertunerusumik paasissutissanik perusukkaanni  saaffigineqassaaq Naalakkersuisoqarfimmi pisortaq Jørn Skov Nielsen

Inuussutissarsiornermut Aatsitassaqarnermut Suliffeqarnermullu Naalakkersuisoqarfik.

Postboks 1601

3900 Nuuk

Tlf.: +299 34 50 00

Fax: +299 32 56 00

E-mail: isiin@nanoq.gl