Nunalerineq pillugu Siunnersuisoqatigiit Qaqortumi ataatsimiinneraniit oqaaseqaat

Savaateqarfik

Nunalerineq pillugu Siunnersuisoqatigiit 31-ssaanik 26. juni 2013 Qaqortumi ataatsimiinneraniit avammut oqaaseqaat.

 

Nunalerineq pillugu Siunnersuisoqatigiit 31-ssaanik 26. juni 2013 Qaqortumi ataatsimiinneranni siulittaasortaaq Niels Lund (SPS), Naalakkersuisunit toqqagaasoq ilisaritinneqarpoq. Niels Lund pingajussaanik Nunalerineq pillugu Siunnersuisoqatigiinni siulittaasunngorpoq. Siulittaasoq savaatiliuvoq taamaattumillu inuussutissarsiummi pissutsit qanimut ilisimasaqarfigilluarlugit.

Ole Mølgaard-Motzfeldt Kommune Kujallermiit siulittaasup tulliatut toqqarneqarpoq.

Siulittaasup siunnersuuteqarneratigut ataani taaneqartut ulluinnarni aqutsisutut toqqarneqarput:

  1. Siulittaasoq Niels Lund (ingerlaannartumik ilaasortaq)
  2. SPS-imit ataaseq sinniisoq, taannalu SPS-imi 28. juni 2013qinersisoqareerpat toqqaasoqassaaq. SPS Siunnersuisoqatigiit allattoqarfianut aqqa nalunaarutigissavaat.
  3. Nunalerineq pillugu Siunnersorteqarfimmi siunnersortaaneq Aqqalooraq Frederiksen
  4. Neqi A/S-mit sinniisoq, Henning Sønderup.

Nunatta Kujataani nersutit nakorsaanik oktober 2012-mili inuttaqarsimanngitsoq pillugu, erseqqissaatigineqarpoq pisariaqarluinnartoq nersutit Kujataani nakorsaqartuaannarnissaa, aammalu asoorniuteqartoqartillugu piaartumik utaqqiisaagallartumik aaqqiissuteqartoqarnissaa aammalu nutaamik atorfinitsitsisoqartariaqartoq kinguarsaasoqarani.

Kalaallit Nunaanni Nersutit nakorsaqarfia aamma Inuussutissalerinermi Oqartussaasut tungaanniit ilisimatitsissutigineqarpoq kiisami nersutit nakorsassaannik julip qaammataani aallartittussamik atorfinitsitsisoqarsimasoq, aammalu erseqqissumik sulinngiffeqarnerup nalaani nalunaaruteqartoqarumaartoq taartaasussanik/saaffigiffissanik.

Siulittaasortaap nuannaarutigaa kiisami aaqqiissutissamik pisoqarmat, nersutit nakorsartaassaata suleqatigilluarnissaanik qilanaarluni oqariartuuteqarpoq. Nunalerineq pillugu Siunnersuisoqatigiit uumasunut nakorsaqarnerup nunatsinnut tamakkiisumik oqartussaaffigilernissaanik isuma tamakkiisumik tapersersorpaa.

Siulittaasortaaq nalunaarpoq siunnersuisoqatigiit ilaasortai allat peqatigalugit Nunalerineq pillugu Ataatsimiititaliarsuup nalunaarusiassaa inassuteqaatissaalu qilanaarlutik siunissami nunalerinermut aaqqiissutissatut pisariaqartinneqavissut inassuteqaatissaat utaqqissallugit.

 

Nunalerineq pillugu Siunnersuisoqatigiit sinnerlugit

 

Niels Lund